Azərbaycan idmanı, xüsusilə futbol və futbol hakimliyi tarixi üçün önəmli şəxsiyyət olan Tofiq Bəhramovun anadan olmasının 100 illiyi münasibətilə tədbirlər davam etdirilir.
“Tehsil365” xəbər verir ki, bu tarixi hadisə münasibətilə “Azərbaycan Futbol Hakimləri” İctimai Birliyinin təşkilatçılığı və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən “Tofiq Bəhramov – 100: Ədalətli Oyun İrsi” layihəsi çərçivəsində ilk seminarlara Lənkəran və Lerik şəhərlərində start verilib.
20 avqust tarixində Lənkəran Olimpiya İdman Kompleksində keçirilən seminarda rayonun idman həvəskarları, futbol veteranları və futbol hakimliyinə marağı olan şəxslər iştirak edib. Tədbir Lənkəran-Astara Regional Gənclər və İdman İdarəsi və Cənub Regional Futbol Federasiyasının tərəfdaşlığı ilə baş tutub.
Tədbirin açılış hissəsində aidiyyəti qurumların rəhbər şəxsləri çıxış edib, tədbirin önəmi barədə danışıblar. “Azərbaycan Futbol Hakimləri” İctimai Birliyinin sədri Gülağa Cabarov, Lənkəran-Astara Regional Gənclər və İdman İdarəsinin idman sektorunun müdiri Yusif Xamıyev və Cənub Regional Futbol Federasiyasının prezidenti Sakin Məmmədzadə çıxış ediblər.
Daha sonra maraqlı video sujetlərə baxdıqdan sonra "Tofiq Bəhramov - 100" kitabçasının təqdimatı baş tutub. Məruzələrdə Tofiq Bəhramov və müasir futbol hakimliyi, idmanda liderlik, futbol oyun qaydalarının maraqlı məqamları müzakirə edilib. Oyun qaydaları üzrə yarış keçirilməklə qalib şəxsə mükafat təqdim olunub. Sonda tərəfdaşlara təşəkkürnamə və seminar iştirakçılarına sertifikatlar və kitabçalar təqdim olunub.
