Müasir elmi tədqiqatlar göstərir ki, məktəblərdə fiziki fəaliyyətə ayrılan vaxt təkcə bədən sağlamlığını deyil, həm də akademik göstəriciləri yaxşılaşdırır.
“Tehsil365” xəbər verir ki, ABŞ-ın Milli Akademiyaları tərəfindən dərc edilmiş hesabatda bildirilir ki, retsess, idman dərsləri və sinifdə fiziki fəaliyyətə ayrılan zamanın artırılması riyaziyyat və oxu fənlərində uğurlara təsir göstərir. Fiziki aktivlik idman dərsləri vasitəsilə bədənin sağlam qalmasını təmin etməklə yanaşı, diqqət və yaddaş kimi kognitiv funksiyaları da aktivləşdirir.
Amerika Xəstəliklərə Nəzarət və Profilaktika Mərkəzinin məlumatlarına görə, fiziki tərbiyə saatlarının çoxaldılması sinifdə diqqətin artırılmasına, akademik göstəricilərin yüksəlməsinə və ümumi məktəbə davamiyyətin yaxşılaşmasına gətirib çıxarır.
Biofizika sahəsi üzrə aparılmış araşdırmalar sübut edir ki, fiziki aktivlik beyin funksiyalarını gücləndirir. Məşğələlər zamanı qan dövranı artır, serotonin və dopamin kimi xoşbəxtlik hormonlarının ifrazı stimullaşdırılır ki, bu da stressi azaldır, yuxunu yaxşılaşdırır və motivasiyanı artırır.
Eyni zamanda, sistemli fiziki fəaliyyət uşaqlarda intellekt səviyyəsinin, verbal və riyaziyyat qabiliyyətlərinin, həmçinin ümumi akademik hazırlığın artımına kömək edir.
Bütün bunlar göstərir ki, sağlam həyat tərzinin məktəb mühitində təşviqi və fiziki tərbiyənin tədris proqramına daxil edilməsi çoxşaxəli faydalar verir. Uşaqlar üçün sağlam və balanslı təhsil mühiti yalnız fiziki cəhətdən deyil, həm də əqli və emosional baxımdan inkişaf etməyə şərait yaradır.