Dövlət İmtahan Mərkəzindən (DİM) bildirilib ki, birinci mərhələdən sonra ali təhsil müəssisələrində bir sıra ixtisas qrupları üzrə boş plan yerləri mövcuddur.
“Tehsil365” xəbər verir ki, ixtisas qrupu üzrə ümumilikdə 1549 boş yer qalıb. Onlardan 1255-i rus bölməsi (RK), 294-ü isə riyaziyyat-informatika (Rİ) altqrupu üzrədir. Rİ altqrupunda müsabiqə şərtini ödəyən 38 abituriyent var və hər biri II turda qəbul olunacaq. RK altqrupunda isə 599 nəfər 150+ nəticə əldə edib ki, onlar yalnız bir ixtisas üzrə qəbul aparılacaq – o da şərabçılıq ixtisasıdır (tədris ingilis dilində).
II ixtisas qrupu üzrə 278 boş yer mövcuddur. Müsabiqə şərtini ödəyən cəmi 18 nəfər var. Düzgün seçim etdikləri halda onların hamısı II turda qəbul olunacaq. Qeyd olunub ki, bu ixtisas qrupunda 150 bal tələb olunan ixtisas qalmayıb.
III ixtisas qrupu üzrə 30 boş yer (hamısı DT altqrupu üzrə) mövcuddur. TC altqrupu üzrə isə ümumiyyətlə boş yer qalmayıb. Bu qrupda müsabiqə şərtini (ümumi balı 200, blok balı 100+) ödəyən 3249 abituriyent var. Bu səbəbdən II turda qəbul daha çətin olacaq.
IV ixtisas qrupu üzrə 218 boş yer qalıb. Bu yerlər uğrunda 233 nəfər mübarizə aparmalıdır. Onlardan 10 nəfərdən çoxu 600+ nəticə əldə edib. Bu qrup üzrə 150 bal tələb olunan ixtisaslardan yalnız bağçılıq və tərəvəzçilik, həmçinin bioehtiyatlar və akvakultura (rus bölməsi üzrə “Садоводство и овощеводство”) ixtisaslarında boş yerlər qalıb. Həmin yerlər uğrunda 291 nəfər yarışacaq.
V ixtisas qrupu üzrə isə 144 boş plan yeri mövcuddur. Bu ixtisasların hamısı xüsusi qabiliyyət tələb edir. Yerlərin seçimi yalnız müvafiq komissiyalar tərəfindən keçirilən qabiliyyət imtahanlarının nəticəsinə əsasən aparılacaq.