Dünyanın ən sevimli və maraqlı heyvanlarından biri sayılan pandalar həm görünüşləri, həm də həyat tərzləri ilə diqqət çəkirlər. Onların əsas qidası bambukdur – gündəlik menyularının 99 faizini bu bitki təşkil edir. Buna baxmayaraq, alimlər bildirirlər ki, pandaların diş və həzm sistemi ətyeyən heyvanlara uyğun qurulub. Bu isə onların təbiətdə qeyri-adi fərqlənməsinə səbəb olur.
“Tehsil365” xəbər verir ki, Panda balalarının doğuluşu da olduqca maraqlıdır. 100 kiloqramdan artıq çəkisi olan ana pandalar cəmi 100–150 qramlıq balalar dünyaya gətirirlər. Bu isə onları məməlilər arasında ən zəif doğulan canlılardan birinə çevirir. Balalar böyüyənə qədər ananın xüsusi qayğısına ehtiyac duyurlar.
Pandaların gündəlik həyatı isə sadədir: onlar günün 12 saatını yemək yeməyə, təxminən 10 saatını isə yatmağa sərf edirlər. Hərəkətsiz və sakit həyat tərzinə baxmayaraq, pandalar çox güclü heyvanlardır.
Onların qara-ağ rəngli kürkləri sadəcə gözəllik üçün deyil. Tədqiqatçılar hesab edir ki, bu rəng kamuflyaj rolunu oynayır – qara ləkələr sıx meşədə gizlənməyə, ağ hissələr isə qarlı dağlarda seçilməməyə kömək edir.
Çində pandalar milli sərvət sayılır. Onlara “milli xəzinə” adı verilib. Üstəlik, Çin uzun illərdir “panda diplomatiyası” adlanan ənənə ilə pandaları digər ölkələrə icarəyə verərək dostluq münasibətlərini gücləndirir.