Şəki-Zaqatala Regional Təhsil İdarəsinin tabeliyində fəaliyyət göstərən ümumi təhsil müəssisələri üzrə 2024–2025-ci tədris ilində buraxılış və ali məktəblərə qəbul imtahanlarının nəticələri açıqlanıb.
Şəki-Zaqatala regional təhsil idarəsindən “Tehsil365”ə məlumat verilib ki, statistikaya əsasən, region üzrə 176 məzun 600-dən yuxarı bal toplayıb.
Nəticələrə görə, Şəki rayonundan 67, Qəbələ rayonundan 57, Zaqatala rayonundan 22, Balakən rayonundan 10, Qax rayonundan 12 və Oğuz rayonundan 8 məzun yüksək nəticə göstərib.
Region üzrə ən yüksək nəticəni Şəki rayonu Orta Zəyzid kənd Asim Kamil oğlu adına 1 nömrəli tam orta məktəbin məzunu Orxan Abdulsəmədli göstərib. O, həm buraxılış, həm də qəbul imtahanlarında maksimum nəticə əldə edərək 700 bal toplayıb. Qax şəhəri N. Allahverdiyev adına 2 nömrəli məktəb-liseyin məzunu Çiçək Hümmətli isə 697 bal nəticə ilə fərqlənib.
Balakən rayonu Amin Novruzov adına Humanitar və texniki fənlər təmayüllü liseyin məzunu Şahin Məmmədov 695 bal, Qəbələ rayonu Daşca kənd tam orta məktəbin məzunu Səmra Mahmudova 692 bal, Oğuz şəhəri Nail İbrahimli adına 3 nömrəli məktəb-liseyin məzunu Gülər Ənsərli 683 bal, Zaqatala şəhəri Şıxəli Qurbanov adına 3 nömrəli tam orta məktəbin məzunu Xanzadə Həsənova isə 678 bal toplayaraq rayon üzrə ən yüksək nəticəyə nail olub.