İnklüziv təhsil hər bir uşağın bərabər imkanlarla tədris prosesinə qoşulmasını nəzərdə tutur. Məktəbəqədər dövrdə inklüziv təhsilin tətbiqi xüsusi qayğıya ehtiyacı olan uşaqların digər həmyaşıdları ilə birgə inkişaf etməsinə, cəmiyyətə uyğunlaşmasına şərait yaradır. Bu yanaşma uşaqlarda tolerantlıq, mərhəmət və paylaşma kimi insani keyfiyyətlərin formalaşmasına da xidmət edir.
Uşaq bağçalarında inklüziv təhsilin təşkili ilk növbədə fərqli imkanlara malik uşaqların cəmiyyətə inteqrasiyasını təmin edir. Onların sağlam uşaqlarla birgə oynamaq, öyrənmək və fəaliyyət göstərmək imkanı sosial bacarıqlarını artırır, özünəinamını gücləndirir. Həmçinin belə bir mühitdə böyüyən sağlam uşaqlar başqalarının fərqliliyini qəbul etməyi öyrənir, empatiya hissləri inkişaf edir.
İnklüziv təhsilin tətbiqi müəllimlərin peşəkarlığını da artırır. Müəllimlər hər bir uşağın fərdi xüsusiyyətini nəzərə alaraq tədris planını qurur, fərqli üsul və metodlardan istifadə edirlər. Bu isə pedaqoji prosesin daha yaradıcı və səmərəli olmasına gətirib çıxarır. Uşaqlar üçün fərdiləşdirilmiş yanaşma həm akademik, həm də sosial inkişaf baxımından müsbət nəticələr verir.
Lakin inklüziv təhsilin uğurla həyata keçirilməsi üçün müəyyən şərtlər də mövcuddur. Bağçalarda xüsusi proqramların hazırlanması, müəllimlərin bu sahədə mütəmadi təlimlər keçməsi, psixoloq və loqoped kimi mütəxəssislərin iştirakı vacibdir. Həmçinin valideynlərin dəstəyi və maarifləndirilməsi mühüm rol oynayır. Valideynlər inklüziv təhsilin mahiyyətini dərk etməli və övladlarının bu prosesə uyğunlaşmasına kömək etməlidirlər.
Məktəbəqədər yaşda inklüziv təhsilin əhəmiyyəti həm uşaqların inkişafı, həm də bütövlükdə cəmiyyətin gələcəyi baxımından böyükdür. Fərqli imkanlara malik uşaqların cəmiyyətin aktiv üzvü kimi yetişməsi, digər uşaqların isə sosial dəyərlərlə böyüməsi inklüziv təhsilin əsas nailiyyətlərindəndir. Bu yanaşma gələcəkdə bərabərlik, ədalət və hörmət prinsiplərinə əsaslanan sağlam cəmiyyətin formalaşmasına zəmin yaradır.
