Aralıq dənizi adətən Yunanıstan, Xorvatiya və İspaniya adaları ilə məşhurdur. Lakin bu mövsüm turistlər arasında populyarlıq qazanan gözlənilməz istiqamətlər də var.
“Tehsil365” xarici mənbələrə istinadən xəbər verir ki, Tivat (Çernoqoriya), Pafos (Kipr) və Antaliya (Türkiyə) artıq rekorda imza ataraq əsas səyahət trendlərinə çevrilib.
Tivat – əlçatan dəbdəbə
Çernoqoriyanın Tivat şəhəri Avropanın ən çox seçilən məkanlarından birinə çevrilib. Burada turistlərdən nə barmaq izi götürülür, nə də giriş haqqı tətbiq olunur. Şəhərə il ərzində təxminən 2 milyon insan gəlir. Tivat həm lüks imkanları, həm də münasib qiymətləri ilə fərqlənir.
Pafos – qədimlik
Kiprin Pafos şəhəri qədim Yunanıstan ab-havası ilə turistləri cəlb edir. Burada UNESCO-nun qoruduğu abidələr, gizli şəlalələr, laqunlar və sakit çimərliklər var. Şəhərin əsas üstünlüyü isə münasib qiymətlərdir. Bu səbəbdən Pafos son illərdə adanın ən çox turist qəbul edən bölgəsinə çevrilib.
Antaliya – tarixin və müasirliyin qovşağı
Türkiyənin Antaliya şəhəri bu mövsüm özünün ən uğurlu avqustunu keçirir. Qiymətlər artsa da, şəhər təkcə çimərliklərdən ibarət deyil. Burada Kaleiçi adlanan tarixi köhnə şəhər, Tünəktepə kanat yolu ilə möhtəşəm mənzərələr, zəngin mətbəx və rəngarəng gecə həyatı turistlərin ixtiyarındadır. Antaliyanın əsas üstünlüklərindən biri də yerli sakinlərin qonaqpərvərliyidir.