Kitab oxumaq insanın bilik dünyasını zənginləşdirən, təfəkkürünü genişləndirən və xəyal gücünü artıran ən gözəl vərdişlərdən biridir. Bu vərdişin uşaqlarda kiçik yaşlardan formalaşdırılması gələcəkdə onların intellektual inkişafına, yaradıcılıq qabiliyyətlərinə və sosial bacarıqlarına mühüm təsir göstərir.
Məktəbəqədər yaş uşaqlar üçün kitab sadəcə məlumat mənbəyi deyil, həm də maraqlı bir oyun, rəngli şəkillərlə dolu nağıl dünyasıdır. Valideynlər və tərbiyəçilər bu mərhələdə uşaqlara kitabı sevdirməyi, onu gündəlik həyatın bir parçasına çevirməyi hədəfləməlidirlər. Kitab oxuma prosesi uşağın diqqətini toplamağı öyrədir, söz ehtiyatını genişləndirir və təxəyyülünü gücləndirir.
Bağçalarda keçirilən nağıl saatları, kitabxana guşələri və mütaliə günləri uşaqların oxu vərdişlərinin təməlini qoyur. Məsələn, müəllim uşaqlara nağıl danışarkən, onları hekayənin qəhrəmanları ilə tanış edir və uşaq özünü həmin obrazların yerində təsəvvür etməyə başlayır. Bu, uşaqlarda həm empatiya bacarığını artırır, həm də yaradıcılıq düşüncəsini inkişaf etdirir.Valideynlərin də bu prosesdə rolu əvəzsizdir. Uşağın evdə özünə məxsus kiçik kitab rəfi olması, ailəvi mütaliə saatlarının keçirilməsi kitab sevgisini daha da gücləndirir. Əgər valideyn uşağa gündəlik bir neçə səhifə oxuyursa, uşaq kitabı həyatın təbii bir hissəsi kimi qəbul edir.
Kitab oxumağı sevən uşaqlar məktəb dövründə daha rahat öyrənir, sözlərlə ifadə qabiliyyətləri yüksəlir və cəmiyyət içində daha özünəinamlı davranırlar. Buna görə də kitab sevgisi bağça yaşlarından başlayaraq uşaqların həyatına daxil edilməli, onların gələcəyinə verilən ən qiymətli hədiyyə kimi dəyərləndirilməlidir.
