31 avqust Salyan şəhərində şəhidlərin əziz xatirəsinə həsr olunmuş futbol üzrə rayon birinciliyinin final oyunu keçirilmişdir. Yarış Salyan Rayon İcra Hakimiyyətinin, Salyan şəhər bələdiyyəsinin və Yeni Azərbaycan Partiyası Salyan rayon təşkilatının birgə təşkilatçılığı, Şirvan-Salyan Regional Gənclər və İdman İdarəsinin dəstəyi ilə Dəmiryolçu stadionunda baş tutmuşdur.
“Tehsil365” xəbər verir ki, final oyunu öncəsi Azərbaycan Respublikasının Dövlət himni səsləndirilmiş, ölkəmizin ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad olunmuşdur. Ardınca Vətən müharibəsi şəhidi Balıyev Hüseynağanın övladı topa rəmzi zərbə vuraraq finala start vermişdir.
Final qarşılaşmasında Kürsəngi və Noxudlu komandaları üz-üzə gəlmiş, gərgin idman mübarizəsi nəticəsində Kürsəngi komandası rəqibini 3:1 hesabı ilə məğlub edərək rayon birinciliyinin qalibi olmuşdur.
Qaliblərin mükafatlandırılma mərasimində Şirvan-Salyan Regional Gənclər və İdman İdarəsinin Salyan rayonu üzrə gənclər və idman sektorunun müdiri Elmar Əbilov, Qarabağ qazisi, Xüsusi Təyinatlı Qüvvələrin giziri Zamiq Əsgərov, Yeni Azərbaycan Partiyası Salyan rayon təşkilatının sədr müavini Aqşin Babayev, Salyan şəhər bələdiyyəsinin sədri Telman Ağabəyov, şəhid ailələri və digər qonaqlar iştirak etmişlər.
Sonda birincilikdə I və II yerləri tutmuş komandaların üzvləri, həmçinin fərqlənmiş futbolçular diplom, kubok və medallarla təltif olunmuşdur.