Gənclər və İdman Nazirliyinin dəstəyi və AMEA-nın Gənc Alim və Mütəxəssislər Şurasının təşkilatçılığı ilə Qazax Olimpiya İdman Kompleksində “Milli dəyərlərlə rəqəmsal gələcəyə” devizi altında gənc alim və tədqiqatçıların yay düşərgəsi təşkil olunub.
“Tehsil365” xəbər verir ki, “Konstitusiya və Suverenlik İli” çərçivəsində keçirilən düşərgədə respublikanın müxtəlif regionlarını təmsil edən magistr, doktorant, gənc alim və tədqiqatçılar iştirak ediblər. Düşərgənin proqramına əsasən, gənc alim və tədqiqatçıların bir araya gələrək bilik və təcrübə mübadiləsi aparması, elmi əməkdaşlıqların qurulması, innovativ ideyaların təşviqi, rəqəmsallaşma və intellektual inkişaf mühitinin gücləndirilməsi üçün geniş platforma yaradılıb.
Həmçinin gənclərlə milli-mənəvi dəyərlərimiz, milli dövlətçilik mövzusunda maarifləndirici görüşlər keçirilib, rayonun tarixi abidələri və məkanları, Qazax Müəllimlər Seminariyası - ADA Universiteti Qazax Mərkəzi ziyarət edilib. Sonda bütün iştirakçılara sertifikatlar təqdim edilib.
