Regionlarda təhsilin vəziyyəti, şagirdlərin keyfiyyətli təhsilə çıxışı və müəllim resurslarının səmərəli istifadəsi gündəmdə olan əsas məsələlərdəndir. Təhsil eksperti Məzahir Məmmədli “Tehsil365”-ə müsahibəsində region məktəblərinin maddi-texniki bazası, müəllim potensialı, distant təhsil imkanları və gələcək inkişaf strategiyaları barədə fikirlərini bölüşüb.
“Regionlarda məktəblərin maddi-texniki bazası və infrastrukturunun vəziyyəti ümumi ölkə səviyyəsi ilə müqayisədə geri qalır. Böyük qəsəbələrdə, rayon mərkəzlərində müəyyən standartlara cavab verən laboratoriyalar mövcud olsa da, ucqar kəndlərdə – şagird sayı 150–180 olan məktəblərdə – tədris üçün lazımi şərait təmin olunmur.
Son illərdə aparılan məktəblərin optimallaşdırılması prosesi isə müəyyən müsbət nəticələr verib. Belə ki, şagird sayı 3–50 arasında dəyişən kiçik məktəblər daha böyük təhsil ocaqlarına birləşdirilib və həmin şagirdlərin nəqliyyatla təmin olunması keyfiyyətin yüksəlməsinə təsir göstərib. Əvvəllər 2–3 nəfərlik məktəblərdə tədrisin keyfiyyəti xeyli aşağı səviyyədə idi.
Məsələ ilə bağlı diqqət çəkən digər tərəf müəllim resurslarıdır. Ucqar kəndlərdə işləyən müəllimlərin əksəriyyəti nisbətən aşağı nəticə göstərənlərdir. Şəhərlərdə isə əksinə, yüksək bal toplayan (95–100 bal arası) namizədlər belə ciddi rəqabətlə üzləşirlər. Bu səbəbdən şəhərlə kənd məktəbləri arasında ciddi fərqlər qalmaqdadır.
Bununla yanaşı, son illərdə MİQ imtahanları vasitəsilə işə qəbul edilən gənc və enerjili müəllimlərin sayəsində müəyyən dönüş müşahidə olunur. Təhsil ekspertləri hesab edirlər ki, ucqar bölgələrdə müəllimlərin fəaliyyətini daha da stimullaşdırmaq üçün əlavə imtiyazlar verilməlidir.
Hazırda müəllimlərə nəqliyyat və qalmaq xərcləri üzrə dəstək göstərilsə də, onlar yalnız üç ildən sonra güzəştli ipoteka imkanlarından yararlana bilirlər. Təklif olunur ki, bu cür imtiyazlar müəllim adını alan gündən tətbiq olunsun. Bu, həm gənc müəllimlərin kənddə qalaraq davamlı işləməsinə, həm də həmin ərazilərdə sosial rifahın yaxşılaşmasına şərait yaradacaq”–deyə ekspert vurğulayıb.
Ekspertlərin fikrincə, region müəllimlərinə daha geniş imkanlar təqdim edilməli, onların kəndlərdə işləməklə yanaşı, təsərrüfat qurmaq və sosial rifahını yaxşılaşdırmaq şansı da artırılmalıdır. Bu istiqamətdə rəsmi səviyyədə daha geniş hazırlıq görülməsi təhsilin inkişafı üçün vacib amil hesab olunur.