Azərbaycanda media qanunvericiliyi, jurnalistlərin hüquqları və söz azadlığının tətbiqi ilə bağlı məsələlər daim müzakirə mövzusu olaraq qalır.
Hüquqşünas Əkrəm Həsənov “Tehsil365”-ə müsahibəsində ölkəmizdə media qanunvericiliyi, jurnalistlərin hüquqları və mövcud problemlərlə bağlı fikirlərini bölüşüb.O bildirib ki, Azərbaycan qanunvericiliyi söz azadlığını qoruyur və jurnalistlərin hüquqları qanunla təmin olunur:
“Ümumilikdə belə deyim ki, Azərbaycan qanunvericiliyi söz azadlığına kifayət qədər şərait yaradır və jurnalistlərin hüquqları bu sahədə qorunur. Yəni Azərbaycanda bununla bağlı elə bir ciddi problem yoxdur. Əsas məsələ odur ki, bizdə böhtan cinayət hesab olunur. İnkişaf etmiş ölkələrdə bu, cinayət deyil, sadəcə mülki məsuliyyət yaradır. Bizdə isə bu, jurnalistləri çətin vəziyyətə sala bilir”.
Ə.Həsənovun sözlərinə görə, jurnalistlər istintaq orqanı olmadıqları üçün hər zaman sübut toplamaq imkanına malik olmurlar. Buna baxmayaraq, fərziyyələr irəli sürərkən diqqətli olmalı, çünki onlara qarşı böhtan ittihamı irəli sürülə bilər.
Hüquqşünas yeni qəbul edilmiş “Media haqqında qanun” barədə də fikirlərini açıqlayıb:
“Jurnalistlərin media reyestrində qeydiyyata düşməsi prinsipcə normaldır. Əgər praktikada əlavə bürokratiya yaratmırsa, problem yoxdur. Mənim fikrimcə, Azərbaycanda jurnalistikanın əsas problemi qanunvericilikdə deyil, onun maliyyələşdirilməsindədir. İnkişaf etmiş, müstəqil jurnalistikanı maliyyələşdirmək üçün iqtisadi mühit lazımdır. Bizdə isə bu, çətinlik yaradır”.
Əkrəm Həsənov həmçinin xəbər yayarkən jurnalistlərin diqqət yetirməli olduğu əsas məqamları da vurğulayıb:
“Cinayət Məcəlləsində böhtan və təhqir halları nəzərdə tutulub və jurnalistlər buna xüsusi diqqət yetirməlidirlər. Bundan başqa, ‘Media haqqında qanun’, ‘İnformasiya əldə edilməsi haqqında qanun’ və dezinformasiyanın qarşısını alan hüquqi normalarla da tanış olmaq vacibdir”.
Onun fikrincə, əsas prinsip belə olmalıdır: əgər məlumatın əksi sübut olunmayıbsa, yayılan xəbər düzgün sayılmalıdır. Əks halda, bu, söz azadlığının məhdudlaşdırılmasına gətirib çıxara bilər.