Gənclər gündəlik həyatda əxlaqi dilemmalar ilə qarşılaşırlar və bu məsələlərdə düzgün qərar vermək üçün yönləndirilməyə ehtiyac duyurlar. Dini təhsil onlara əxlaqi dəyərləri anlamaq və sosial davranışlarda düzgün seçimlər etmək imkanı verir.
“Tehsil365” xəbər verir ki, sosioloq Üzeyir Şəfiyev’ə görə, dini təhsilin keyfiyyəti müəllimin obyektivliyindən və dini qərəzsizliyindən asılıdır. “Dini bilikləri ali təhsil almış, amma heç bir dini təriqətin təsirinə düşməmiş müəllim gənclərə bütün dinlərlə bağlı, insanlığa xidmət edən mənəvi və əxlaqi dəyərləri çatdıra bilər. Təəssüf ki, bəzən dini tədris edənlər müəyyən təriqətlərin təsiri altında olur və bu, gənclərə obyektiv təsir etməyə mane olur”, – deyə Üzeyir Şəfiyev qeyd edib.
O həmçinin vurğulayıb ki, gənclər dini bilikləri özləri də müstəqil şəkildə araşdırmalıdırlar. “Gənclər dini kitablarla tanış olmalı, həm dini, həm milli mənəvi əxlaqi dəyərləri mənimsəməlidirlər. Bu, onların mənəvi saflaşmasına və əxlaqi qərar vermə bacarığının formalaşmasına xidmət edir,” – deyə sosioloq bildirib.
Üzeyir Şəfiyev əlavə edib ki, dini təhsil yalnız dini biliklərin öyrədilməsi deyil, həm də gənclərin sosiallaşmasına və cəmiyyətə faydalı, əxlaqlı fərdlər kimi yetişməsinə töhfə verir. “Gənclərin dini təhsili, onların hansı davranışların insanlığa zidd olduğunu anlamasına, yaxşı ilə pis, müsbət ilə mənfi arasındakı fərqi ayırd etməsinə kömək etməlidir. Bunun üçün müəllimlər və valideynlər diqqətli olmalı, gənclərin dini təriqətlərin təsiri altında fanatikləşməsinin qarşısını almalıdırlar,” – deyə sosioloq qeyd edib.
O həmçinin əlavə edib ki, dinin sosial və mənəvi tərəfləri daha çox önə çıxarılmalı, dini sektaların və təriqətlərin rəqabətinə diqqət yetirilməməlidir. Bu, gənclərin dini bilikləri mənəvi və əxlaqi dəyərlər baxımından anlamasına imkan yaradır.