Müasir gənclərin dini təhsilə yanaşması ilə klassik dövrlərdəki yanaşmalar arasında ciddi fərqlər mövcuddur.
“Tehsil365” xəbər verir ki, ilahiyyatçı Ağa Hacıbəyli qeyd edir: "Klassik dövrdə dini təhsil əsasən mədrəsələrdə verilirdi və bilik birbaşa müəllim, ustad və mürşiddən öyrənilirdi. Kitablar az idi, tədris məhdud bölgələrdə aparılırdı və elm ilə əməl birliyi ön planda idi. İnsanlar dini elmi Allahın rizasına çatmaq üçün, səmimiyyətlə öyrənirdilər”.
İlahiyyatçı bildirir ki: "Müasir dövrdə gənclər dini bilikləri sosial şəbəkələr, internet və müxtəlif mənbələr vasitəsilə əldə edirlər. Bilgi sürətli əldə olunsa da, səthi qalma ehtimalı yüksəkdir. Klassik dövrdə elm zəhmətlə və dərin düşüncə ilə öyrənilirdisə, bu gün gənclər bir neçə dəqiqədə böyük informasiyaya sahib ola bilirlər”.
Hacıbəyli vurğulayır: "Dəyişən üsul və metodlara baxmayaraq, Allah hələ də eynidir və elmi əldə edən, mərifət yolunda addım atan hər kəs həm dünyada, həm də Allah qatında qiymət qazanır. Elmin dərinliyi və səmimiyyəti insanın cəmiyyətdə və fərdi həyatında rolunu müəyyən edir”.