Azərbaycanda dini təhsil gənclərin gündəlik həyatda rastlaşdıqları əxlaqi dilemmaları anlamaq və düzgün qərar vermək qabiliyyətinə təsir göstərir.
“Tehsil365” xəbər verir ki, sosioloq Hüseyn İbrahimovun sözlərinə görə, dini və dünyəvi biliklərin birgə tədrisi gənclərin milli-mənəvi dəyərlərlə formalaşmasında əhəmiyyətlidir.
Ölkəmiz zəngin milli-mənəvi dəyərlərə malikdir və bu dəyərlər içərisində dini biliklər də xüsusi yer tutur. Sosioloq Hüseyn İbrahimovun sözlərinə görə, gənclərin dini dünyagörüşü daha çox ailə institutunda formalaşır. Ailə institutunun rolu bu baxımdan həlledici olsa da, məktəb və ali təhsil müəssisələrində də dünyəvi biliklərlə birgə dini və milli-mənəvi dəyərlərin tədrisi vacibdir.
İbrahimovun fikrincə, yalnız dini təhsilin verilməsi bəzən birtərəfli biliklə nəticələnir və bu da gənclərin əxlaqi mühakimələrinə təsir edə bilər. Buna görə də orta və ali təhsil səviyyəsində fəlsəfə, din tarixi və din sosiologiyası kimi fənlərin tədrisinin genişləndirilməsi vacibdir. Bu yanaşma gənclərin həm dini dünyagörüşünü, həm də müasir dünyagörüşünü balanslı formalaşdırmağa imkan yaradır.
O, həmçinin vurğulayıb ki, ədəbiyyat və mədəniyyət vasitəsilə milli-mənəvi dəyərlərin məktəbdə tədrisi gənclərin əxlaqi davranışlarını gücləndirir. Beləliklə, dini təhsil yalnız dini biliklərin verilməsi deyil, həm də gənclərin həyatında düzgün qərar vermə qabiliyyətini və əxlaqi prinsipləri möhkəmləndirir.
