Dövlət İmtahan Mərkəzi (DİM) avqustun 22-də 2025/2026-cı tədris ili üzrə Azərbaycan Respublikasının ali təhsil müəssisələrinə yerləşdirmənin nəticələrini elan edib.
“Tehsil365” xəbər verir ki, müsabiqənin nəticələrinə əsasən, 57 min 236 nəfər (o cümlədən 6 min 461 subbakalavr) ali təhsil müəssisələrinə qəbul olunub. Onlardan 27 min 956 nəfəri (1 728 subbakalavr daxil olmaqla) dövlət sifarişi əsasında, 29 min 280 nəfəri (4 733 subbakalavr daxil olmaqla) isə ödənişli əsaslarla təhsil almaq hüququ qazanıb. Beləliklə, ali təhsil müəssisələrinin qəbul planı 96,27 faiz dolub. Avqustun 28-dən sentyabrın 2-dək boş qalan plan yerlərinə ixtisas seçimi aparılacaq və göstəricinin daha da yüksələcəyi gözlənilir.
Ötən illə müqayisədə tələbə adını qazananların sayı bu il 1 580 nəfər çox olub. Dövlət sifarişi əsasında qəbul olunanların sayı isə 839 nəfər artıb. Son illərdə dövlət sifarişli yerlərin sayının artırılması ödənişsiz təhsil imkanlarının genişlənməsinə səbəb olub.
Plan yerlərinin ən çox dolduğu ixtisas qrupu III qrup olub – burada dolma faizi 99,80 təşkil edib. TC altqrupunda isə plan yerləri tamamilə dolub. II ixtisas qrupunda bu göstərici 98,12 faiz, I qrup üzrə 92,25 faiz, IV və V ixtisas qruplarında isə müvafiq olaraq 95,39 və 96,84 faiz təşkil edib.
Subbakalavrların ən çox qəbul olunduğu sahə də II ixtisas qrupu olub – burada 3 079 nəfər təhsil hüququ qazanıb. I qrup üzrə 2 842, III qrup üzrə isə yalnız abituriyentlər qəbul olunublar.
Ali təhsil müəssisələri üzrə vəziyyət
İlkin mərhələdən sonra tələbə qəbulu aparılan 43 mülki ali təhsil müəssisəsinin 12-də (Azərbaycan Tibb Universiteti, Dövlət İdarəçilik Akademiyası, Azərbaycan Dövlət Rəssamlıq Akademiyası, Azərbaycan Turizm və Menecment Universiteti, Bakı Xoreoqrafiya Akademiyası, Bakı Ali Neft Məktəbi, Dövlət Gömrük Komitəsinin Akademiyası, Azərbaycan İlahiyyat İnstitutu, Bakı Avrasiya Universiteti, Odlar Yurdu Universiteti, Bakı Biznes Universiteti, Azərbaycan Əmək və Sosial Münasibətlər Akademiyası) plan yerləri 100 faiz dolub. Digər 26 ali təhsil müəssisəsində isə dolma faizi 90-dan yuxarı olub.
Ümumilikdə bu il ali təhsil müəssisələrinə qəbul olunan subbakalavrların sayı 6 461 nəfərdir ki, bu da ötən ildən 826 nəfər azdır. Subbakalavrların ən çox qəbul olunduğu ali məktəblər Azərbaycan Texnologiya Universiteti (589 nəfər), Mingəçevir Dövlət Universiteti (506 nəfər) və Azərbaycan Dövlət Aqrar Universitetidir (459 nəfər).
Boş qalan plan yerləri və qeydiyyat
Qəbul planında I ixtisas qrupu üzrə 1 549, II qrup üzrə 278, III qrup üzrə 30, IV qrup üzrə 218, V qrup üzrə isə 144 plan yeri boş qalıb. Boş yerlərin müsabiqəsində müəyyən bal tələblərini ödəyən abituriyentlər iştirak edə biləcəklər.
Ali təhsil müəssisələrinə qəbul olunan abituriyentlər avqustun 28-dən sentyabrın 8-dək portal.edu.az saytında elektron qeydiyyatdan keçməlidirlər. Müəyyən olunmuş müddətdə qeydiyyatdan keçməyən abituriyentlərin qəbul əmrləri ali məktəblərə göndərilməyəcək.
Boş qalan plan yerlərinin siyahısı isə “Abituriyent” jurnalının 7-ci sayında dərc ediləcək.