“Son illərdə region məktəblərinin maddi-texniki bazasında nəzərəçarpacaq yaxşılaşmalar müşahidə olunur. Yeni məktəb binalarının inşası, İKT avadanlıqlarının yenilənməsi və laboratoriyaların yaradılması bu prosesin mühüm göstəriciləridir. Lakin paytaxt məktəbləri ilə müqayisədə regionlarda hələ də müəyyən fərqlər qalmaqdadır. Xüsusilə müasir tədris resursları, STEM laboratoriyaları, texnologiyaya çıxış imkanları və idman zalları baxımından gerilik hiss olunur”.
Bu fikirləri “Tehsil365”ə müsahibəsində təhsil eksperti Rasim Həsənzadə bildirib.
Ekspertin sözlərinə görə, müəllim resursları sahəsində də çatışmazlıqlar diqqət çəkir:
“Müəllim resursları sahəsində isə problem daha qabarıqdır. Ucqar rayonlarda bəzi fənlər üzrə kadr çatışmazlığı şagirdlərin tədris keyfiyyətinə birbaşa təsir göstərir. Bununla yanaşı, müəllimlərin sertifikasiyası, işə qəbulun şəffaflaşdırılması və motivasiya mexanizmləri kimi son illərdə həyata keçirilən tədbirlər regionlarda müəllim resurslarının tədricən güclənməsinə xidmət edir”
Ekspert hesab edir ki, regionlarda təhsilin inkişafı üçün üç əsas strategiya önəmlidir:
1. İnfrastruktur və texnologiya yatırımları – yalnız məktəb binalarının yenilənməsi deyil, həm də müasir laboratoriyaların, kitabxanaların, internet şəbəkəsinin və rəqəmsal resursların genişləndirilməsi vacibdir.
2. Müəllimlərin davamlı inkişafı – regionlarda müəllimlər üçün həm yerində, həm də distant təlimlər, mentorluq sistemləri və universitet-məktəb əməkdaşlıqları gücləndirilməlidir. Çünki ən yaxşı infrastruktur belə, yaxşı müəllim olmadan nəticə vermir.
3. İcma əsaslı yanaşma – məktəblərin yalnız tədris yeri deyil, həm də sosial-mədəni mərkəzə çevrilməsi, valideyn və yerli icmaların təhsilə daha fəal cəlb olunması zəruridir.
“Ümumilikdə regionlarda təhsil islahatlarının uğurlu tətbiqi paytaxt məktəbləri ilə region məktəbləri arasındakı fərqləri azalda bilər. Bu isə həm sosial bərabərliyə, həm də ölkənin insan kapitalının inkişafına mühüm töhfə verəcəkdir”, – deyə Rasim Həsənzadə vurğulayıb.