Mingəçevir Dövlət Universitetinin yeni kampus tikintisinə uzun fasilədən sonra rəsmi olaraq start verilib.
Mingəçevir Dövlət Universitetindən “Tehsil365”ə məlumat verilib ki, bu gün kampus ərazisinə baxış keçirilib və tikinti işlərinin yenidən başladığı elan olunub. Layihə 7 hektar ərazini əhatə edir və tələbələrə, eləcə də universitet kollektivinə geniş imkanlar təqdim edəcək.
Yeni kampusda müasir tədris binaları, konfrans zalı, kitabxana, oğlan və qız tələbələr üçün yataqxana, müəllimlər üçün studio tipli mənzillər, hotel binası, peşə məktəbi, açıq və qapalı idman zalları, müasir laboratoriyalar, biznes inkubasiya və startap mərkəzləri, həmçinin tələbələr üçün müxtəlif istirahət guşələri nəzərdə tutulub.
Layihə Mingəçevir Dövlət Universitetinin gələcək inkişafı, təhsilin keyfiyyətinin yüksəldilməsi və tələbələrin daha müasir şəraitdə təhsil almasına xidmət edəcək.