2024–2025-ci tədris ili üzrə ölkənin 84 peşə təhsili müəssisəsinə 136 ixtisas üzrə aparılan tələbə qəbulu çərçivəsində ümumilikdə 24 min 821 nəfər peşə təhsilinə qəbul olunub. Bu göstərici ötən illə müqayisədə 21 faiz artım deməkdir.
Təhsil Nazirliyindən “Tehsil365”ə bildirilib ki, qəbul olunanların 15 min 890 nəfəri kişi, 8 min 931 nəfəri isə (36 faiz) qadındır. Onlardan 21 min 179 nəfər dövlət sifarişi əsasında, 3 min 642 nəfər isə ödənişli əsaslarla təhsil almağa başlayacaq.
İlk dəfə olaraq bu il Naxçıvan Muxtar Respublikasında tələbə qəbulu elektron sistem vasitəsilə həyata keçirilib və 453 nəfər qəbul olunub.
Müraciət edənlərin orta yaşı 22, ən gənc namizəd 14, ən yaşlısı isə 69 yaşında olub. Qəbul olunanlar arasında 74 nəfər ali, 244 nəfər isə orta ixtisas təhsilli şəxs, eləcə də 66 xarici vətəndaş yer alır.
Son dörd ildə dövlət sifarişi ilə ayrılmış yerlərin sayı əhəmiyyətli dərəcədə artaraq 64 faiz yüksəlib. Belə ki, 2021–2022-ci tədris ilində bu rəqəm 14 min 160 nəfər olduğu halda, cari tədris ilində 23 min 185 nəfərə çatıb.
Dual peşə təhsilinə maraq artır
2024–2025-ci tədris ilində 25 peşə təhsili müəssisəsində 110-dan artıq işəgötürənlə əməkdaşlıq çərçivəsində 70 qrup üzrə 1273 nəfər dual peşə təhsili proqramına qəbul olunub. Bu göstərici ötən illə müqayisədə 46 faiz artım deməkdir. Proqram 16 regionda – Bakı ilə yanaşı Zaqatala, Balakən, Biləsuvar, Cəlilabad, Gəncə, İmişli, İsmayıllı, Kürdəmir, Qax, Qəbələ, Lənkəran, Neftçala, Saatlı, Sumqayıt və Şəki şəhər və rayonlarını əhatə edir. Dual proqram çərçivəsində ümumilikdə 30 ixtisas üzrə tədris həyata keçirilir.
Yüksək texniki peşə təhsilinə qəbul davam edir
Cari tədris ilində yüksək texniki peşə təhsili səviyyəsində 19 ixtisas üzrə tələbə qəbulu həyata keçirilib. Bu səviyyədə təhsil almaq hüququ qazananların sayı 2453 nəfər olub. Qeyd edək ki, 2024-cü ildə bu pilləni başa vuran 281 məzundan 148-i (52,7 faiz) ali təhsil müəssisələrinə imtahansız qəbul olunub.
Təhsilin bərpası və köçürülmə xidmətlərinə maraq
2024–2025-ci tədris ilinin birinci yarımilində “Təhsilin bərpası” xidməti üzrə 125 nəfər müraciət edib, onlardan 56 nəfərin təhsil müəssisələrinə bərpası həyata keçirilib. “Təhsilalanların köçürülməsi” xidməti çərçivəsində isə 53 müraciətdən 24-nə müsbət cavab verilib.
Qarabağda peşə təhsili infrastrukturunun genişləndirilməsi davam edir
Qarabağ iqtisadi rayonunda peşə təhsili infrastrukturu sürətlə bərpa olunur. Füzuli Peşə Təhsil Mərkəzinin 700 nəfərlik yeni binasının tikintisi davam edir. Burada müasir əmək bazarının tələblərinə uyğun olaraq təyyarə və uçan aparat mühərrikləri üzrə mexanik, pilotsuz uçuş aparatlarının təmiri üzrə texnik, yerüstü aviasiya avadanlıqları üzrə mexanik və digər qabaqcıl ixtisasların tədrisi nəzərdə tutulur.