2024–2025-ci tədris ili üzrə ölkə üzrə 12 ali təhsil müəssisəsində (ATM) institusional akkreditasiya qiymətləndirilməsi həyata keçirilib. Qrafikə uyğun olaraq, Naxçıvan Dövlət Universiteti, Azərbaycan İdman Akademiyası, Bakı Slavyan Universiteti, Azərbaycan Dövlət Dəniz Akademiyası, Bakı Ali Neft Məktəbi, Odlar Yurdu Universiteti, Bakı Qızlar Universiteti, Mingəçevir Dövlət Universiteti və Azərbaycan Respublikası Prezidenti yanında Dövlət İdarəçilik Akademiyasında institusional akkreditasiya qiymətləndirilməsi, Sumqayıt Dövlət Universiteti, Azərbaycan Dövlət İqtisad Universitetinin Zaqatala filialı və Bakı Dövlət Universitetinin Qazax filialında isə təkrar institusional akkreditasiya qiymətləndirilməsi aparılıb.
“Tehsil365” xəbər verir ki, proqram akkreditasiyası çərçivəsində 11 ATM-də (“Azərbaycan Dövlət Pedaqoji Universiteti” və onun Ağcabədi, Quba, Cəlilabad və Şəki filialları, Azərbaycan Dillər Universiteti, Bakı Slavyan Universiteti, Bakı Qızlar Universiteti, Mingəçevir Dövlət Universiteti, Xəzər Universiteti, Lənkəran Dövlət Universiteti) “İbtidai sinif müəllimliyi” ixtisası, 7 ATM-də isə (“Azərbaycan Dövlət Pedaqoji Universiteti” və onun Ağcabədi, Quba, Şəki və Cəlilabad filialları, Lənkəran Dövlət Universiteti, Mingəçevir Dövlət Universiteti) “Məktəbəqədər təhsil” ixtisası üzrə qiymətləndirmə aparılıb.
Akkreditasiya Şurasının 28 noyabr 2024-cü il tarixli iclasında Azərbaycan Turizm və Menecment Universiteti, Bakı Biznes Universiteti, Qərbi Kaspi Universiteti, Azərbaycan Dövlət Neft və Sənaye Universitetinin 2024–2025-ci tədris ilindən etibarən 5 il müddətinə institusional akkreditasiyadan keçməsi barədə qərar qəbul olunub. Gəncə Dövlət Universitetinin mövcud akkreditasiya şəhadətnaməsinin müddəti isə 2 il uzadılıb və 1 ildən sonra təkrar akkreditasiya olunması qərara alınıb.
Eyni iclasda dövlət tərəfindən maliyyələşdirilən ikili diplom proqramlarının 4 ali təhsil müəssisəsi üzrə (Azərbaycan Dövlət Pedaqoji Universiteti – Corc Vaşinqton Universiteti, Azərbaycan Dövlət Aqrar Universiteti – Ege Universiteti, Bakı Mühəndislik Universiteti – İNHA Universiteti, ADA Universiteti – Corc Vaşinqton Universiteti) 3 ixtisaslaşma və 8 ixtisas üzrə proqram akkreditasiya qiymətləndirilməsi yekunlaşdırılıb.
Şuranın həmin iclasında Azərbaycan Dövlət Pedaqoji Universitetinin Şamaxı filialı, Gəncə Dövlət Universiteti və Naxçıvan Müəllimlər İnstitutunda “İbtidai sinif müəllimliyi” ixtisası üzrə proqram akkreditasiya qiymətləndirilməsinin nəticələri də müzakirə olunaraq qərara alınıb.
Bundan əlavə, Azərbaycan Memarlıq və İnşaat Universitetində bakalavriat səviyyəsində “İnşaat mühəndisliyi” və “Nəqliyyat tikintisi mühəndisliyi”, magistratura səviyyəsində “İnşaat mühəndisliyi” ixtisaslarının; Azərbaycan Dövlət Mədəniyyət və İncəsənət Universitetində bakalavriat səviyyəsində “Operator sənəti”, “Aktyor sənəti” və “Teatrşünaslıq” ixtisaslarının; Azərbaycan İdman Akademiyasında isə bakalavriat səviyyəsində “İdman menecmenti və kommunikasiya”, magistratura səviyyəsində “İdman tibbi və reabilitasiya” və “İdman menecmenti” ixtisaslarının beynəlxalq proqram akkreditasiya nəticələrinin dövlət akkreditasiyası tərəfindən nəzərə alınmasına dair qərar qəbul edilib.