Göygöldə “GəncLİK – Gənc Liderlərin İnkişafı və Karyerası” düşərgəsinin açılışı olub. Layihə Gənclər və İdman Nazirliyinin dəstəyi, “ASAN Könüllüləri” Təşkilatının təşkilatçılığı və Göygöl Rayon İcra Hakimiyyətinin tərəfdaşlığı ilə həyata keçirilir. Düşərgədə 15–26 yaş aralığında fəal gənclər iştirak edir.
“Tehsil365” xəbər verir ki, tədbirin ilk günündə gənclər Ümummilli Lider Heydər Əliyevin abidəsini ziyarət edib, daha sonra Şəhidlər Xiyabanında Vətən uğrunda canından keçmiş qəhrəmanların xatirəsini ehtiramla yad ediblər. İştirakçılar həmçinin Göygöl rayonunun tarixi məkanları – yeraltı şərab zirzəmiləri, Lüteran kilsəsi və alman evləri ilə tanış olublar.
Beş gün davam edəcək düşərgə çərçivəsində gənclərə liderlik, şəxsi inkişaf, layihə idarəetməsi, sosial media, marketinq və sağlam həyat tərzi mövzularında peşəkar təlimlər təqdim olunacaq.
