Naxçıvan Dövlət Universiteti İncəsənət fakültəsinin Musiqinin tarixi və nəzəriyyəsi kafedrasının dosenti, Naxçıvan Muxtar Respublikasının Əməkdar İncəsənət Xadimi, bəstəkar Kamal Rüstəm oğlu Əhmədov beynəlxalq uğura imza atıb.
Naxçıvan Dövlət Universitetindən “Tehsil365”ə məlumat verilib ki, 28 avqust 2025-ci il tarixində Londonda keçirilən “Qızıl Əsrin İstedadları” adlı beynəlxalq müsabiqənin 71-ci mövsümündə iştirak edən bəstəkar bir neçə əsəri ilə qalib adını qazanıb.
Müsabiqəyə təqdim olunan Elbəyi Maqsudovun sözlərinə yazılmış solo tenor və simfonik orkestr üçün “Vətəndir” romansı, violin və piano üçün “Kapriççio”, eləcə də qanun və piano üçün “Rapsodiya” əsərləri münsiflər heyəti tərəfindən yüksək qiymətləndirilib. Hər üç əsər I dərəcəli diplomla təltif olunub.
Qeyd olunub ki, “Qızıl Əsrin İstedadları” (Golden Time Talent) beynəlxalq miqyasda tanınan istedad platformasıdır və dünyanın müxtəlif ölkələrindən yaradıcı şəxsləri bir araya gətirir.