2025-ci il 9 sentyabr tarixində Quba-Xaçmaz Regional Təhsil İdarəsinin tabeliyində fəaliyyət göstərən Quba rayonu üzrə ümumi təhsil müəssisələrinin 600-dən çox bal toplayan məzunları ilə görüş keçirilib.
“Tehsil365” xəbər verir ki, bu barədə Quba Rayon İcra Hakimiyyəti paylaşım edib.
Paylaşımda qeyd olunun ki, tədbirdə Quba Rayon İcra Hakimiyyətinin başçısı İlqar Mahmudov, Quba-Xaçmaz Regional Təhsil İdarəsinin müdiri Coşqun Əliyev, təhsil sektorunun əməkdaşları, məktəb direktorları və yüksək nəticə göstərmiş məzunlar iştirak ediblər.
Çıxış edən İcra Hakimiyyətinin başçısı İlqar Mahmudov və Regional Təhsil İdarəsinin müdiri Coşqun Əliyev məzunları, onların müəllimlərini və valideynlərini təbrik ediblər. Bildirilib ki, ölkədə təhsilə göstərilən dövlət qayğısı və regionda aparılan islahatlar ümummilli lider Heydər Əliyevin təhsilə verdiyi xüsusi önəmin davamıdır və Prezident İlham Əliyev tərəfindən uğurla inkişaf etdirilir.
Görüş zamanı tələbə adını qazanan məzunlar da çıxış edərək göstərilən diqqət və qayğıya görə minnətdarlıqlarını ifadə ediblər.
Sonda yüksək nəticə göstərmiş məzunlara Quba Rayon İcra Hakimiyyətinin başçısı tərəfindən Fəxri Fərmanlar və hədiyyələr təqdim olunub.