Qəbələ şəhəri Şirvan Bulqədirov adına 5 nömrəli tam orta məktəbdə Qəbələ rayonu üzrə təhsil sektorunun və Elm və Təhsil İşçiləri Həmkarlar İttifaqı Qəbələ Şəhər Komitəsinin birgə təşkilatçılığı ilə rayon üzrə 600-dən yuxarı bal toplayaraq ali məktəblərə qəbul olmuş məzunlarla görüş keçirilib.
“Tehsil365” xəbər verir ki, bu barədə Şəki-Zaqatala Regional Təhsil İdarəsi paylaşım edib.
Bildirilib ki, tədbirdə Qəbələ Rayon İcra Hakimiyyəti başçısının müavini Ətayə Osmanova, rayon üzrə təhsil sektorunun müdiri Arifə Bayramova, sektor əməkdaşları, məktəb rəhbərləri və valideynlər iştirak ediblər.
Çıxış edənlər ali məktəblərə qəbul olan gəncləri tələbə adına layiq görülmələri münasibətilə təbrik edib, onlara vətənimizə, xalqımıza gərəkli mütəxəssis kimi yetişməyi arzulayıb, müəllimlərin və valideynlərin etimadını doğrultmağı, rayonun adını daim uca tutmağı tövsiyə edib.
Tədbir zamanı çıxış edən məzunlar, onların valideynləri və təhsil işçiləri gənclərlə görüşün təşkilinə, göstərilən diqqət və qayğıya görə minnətdarlıqlarını bildiriblər.
Tədbirdə qəbul imtahanlarında 600 baldan yuxarı nəticə göstərən məzunlara ETİHİ Qəbələ Şəhər Komitəsinin hədiyyələri təqdim olunub.
Qeyd edilib ki, 2024–2025-ci tədris ilində ali məktəblərə qəbul olmaq üçün sənəd vermiş 750 məzundan 584 nəfəri tələbə adını qazanıb. Məzunlardan 86 nəfəri isə 500-600 bal arası, 57 nəfəri isə 600 baldan yuxarı nəticə göstərib.Qəbul imtahanlarında Qəbələ rayonu Daşca kənd tam orta ümumtəhsil məktəbin məzunu Səmra Mahmudova 692.6 bal toplayaraq rayon üzrə ən yüksək nəticə göstərib.