Azərbaycan gəncləri Hindistanın Noida şəhərində keçirilən “TechnoXian World Cup 9.0” beynəlxalq robotexnika yarışında böyük uğura imza atıblar. Komandamız nüfuzlu turnirdə həm qızıl, həm də gümüş medallara layiq görülüb.
“Tehsil365” xəbər verir ki, 70-dən çox ölkədən 12 min iştirakçının qatıldığı yarışda Azərbaycan komandası Dron Yarışı (PUA) kateqoriyasında Qrand Çempion titulunu qazanaraq dünya birincisi, RC Craft (Aviamodelizm) üzrə isə dünya ikincisi olub.
Bu nailiyyətlər Rəqəmsal İnkişaf və Nəqliyyat Nazirliyi, Gənclər və İdman Nazirliyi, həmçinin AREA Akademiyasının təşkilati dəstəyi ilə mümkün olub. Komandamız 8 heyətlə iştirak edərək ölkəmizin adını bir daha beynəlxalq texnologiya arenasında ucaldıb.
Yarış çərçivəsində Azərbaycan gənclərinin təqdim etdiyi texnoloji həllər münsiflər heyəti tərəfindən yüksək qiymətləndirilib. Bu nəticələr ölkəmizin robotexnika və süni intellekt sahəsində artıq qlobal səviyyədə söz sahibinə çevrildiyini təsdiqləyir.