Sentyabrın 12-də Mingəçevir şəhər İcra Hakimiyyətinin başçısı İlham İsmayılov 2025–2026-cı tədris ilində birinci sinfə gedəcək şəhid övladları – 44 günlük Vətən müharibəsi şəhidləri Nahid İbrahimzadənin oğlu Həsən İbrahimzadə və Oruc Nəcəflinin qızı Rövşanə Nəcəfli ilə görüşüb.
Mingəçevir şəhər İcra Hakimiyyətindən “Tehsil365”ə məlumat verilib ki, görüş zamanı icra başçısı ölkə Prezidenti İlham Əliyevin tapşırığı ilə şəhid ailələrinə, qazilərə və onların övladlarına göstərilən diqqət və qayğıdan danışıb.
Qeyd edib ki, torpaqlarımızın azad olunması və Azərbaycanın ərazi bütövlüyünün təmin olunması uğrunda həlak olan qəhrəmanların xidmətləri xalqımızın yaddaşında əbədi yaşayacaq.
Şəhər rəhbəri həmçinin Heydər Əliyev Fondunun prezidenti Mehriban Əliyevanın təşəbbüsü ilə hər il olduğu kimi bu il də məktəbli şəhid övladlarına, eləcə də YAŞAT Fondu tərəfindən göstərilən dəstəyə diqqət çəkib.
O, balaca məktəbliləri təbrik edərək təhsildə uğurlar arzulayıb və yaxşı oxumağın Vətənin ləyaqətli övladı olmaq üçün vacib olduğunu vurğulayıb.
Birincilərə məktəb ləvazimatları, çanta və məktəbli geyimindən ibarət hədiyyələr təqdim olunub. Hər iki uşaq Mingəçevir şəhər 8 nömrəli tam orta məktəbdə təhsil alacaq.
Şəhid atası Şahid İbrahimzadə və şəhidin həyat yoldaşı Pərvanə Nəcəfli göstərilən diqqət və qayğıya görə minnətdarlıqlarını bildiriblər. Sonda xatirə şəkli çəkdirilib.
