Sentyabrın 18-də Azərbaycan milli musiqisinin banisi, ilk Şərq operasının müəllifi və Dövlət Himninin bəstəkarı Üzeyir Hacıbəylinin 140 illiyi UNESCO-nun mənzil-qərargahında qeyd olunacaq.
“Tehsil365” AZƏRTAC-a istinadən xəbər verir ki, tədbir Azərbaycanın UNESCO yanındakı daimi nümayəndəliyi və "Fransa-Azərbaycan Dialoqu" assosiasiyasının təşəbbüsü ilə keçiriləcək. Musiqi proqramı fransalı violonçelçi, "Arts Au Diapason" assosiasiyasının prezidenti Lora Volpatonun rəhbərliyi ilə hazırlanıb.
Konsertdə Lora Volpato “Trio Avey” ansamblı ilə birgə çıxış edəcək. Ansambl (violonçel, fleyta, piano) Hacıbəylinin seçilmiş əsərlərini səsləndirəcək.
Qeyd olunub ki, Üzeyir Hacıbəyli yalnız Azərbaycanın deyil, İslam dünyasının da mədəni tarixində iz qoyub. O, ilk müsəlman operasının – "Leyli və Məcnun"un müəllifi, Azərbaycan Dövlət Konservatoriyasının qurucusu olub. Qərb klassik musiqisini Şərq muğamı ilə birləşdirərək unikal musiqi dili yaradıb.
UNESCO-da keçirilən yubiley konserti onun irsinin dünyada tanıdılması və yaşadılması baxımından mühüm əhəmiyyət daşıyır.