Azərbaycan musiqisinin banisi, dahi bəstəkar Üzeyir Hacıbəylinin 140 illiyi münasibətilə Xankəndi şəhərində musiqi axşamı keçirilib.
“Tehsil365” “Report”a istinadən xəbər verir ki, Konqres Mərkəzində təşkil olunan konsertdə Bakı Musiqi Akademiyasının tələbə simfonik orkestri çıxış edib. Orkestrə Ramiz Məlikaslanov dirijorluq edib, bədii rəhbərliyi xalq artisti, professor Fərhad Bədəlbəyli həyata keçirib. Proqramda Hacıbəylinin əsərləri ilə yanaşı, F. Mendelsonun simfoniyası da səsləndirilib.
Tədbirdə Prezidentin Xankəndi, Ağdərə və Xocalı rayonları üzrə xüsusi nümayəndəliyinin və Bərpa, Tikinti və İdarəetmə Xidmətinin əməkdaşları, Qarabağ Universitetinin professor-müəllim heyəti və tələbələri, deputat Polad Bülbüloğlu və ictimaiyyət nümayəndələri iştirak ediblər.
Çıxış edənlər – Qarabağ Universitetinin rektoru Şahin Bayramov, Fərhad Bədəlbəyli və Polad Bülbüloğlu Xankəndidə belə bir konsertin keçirilməsini tarixi və qürurverici hadisə kimi qiymətləndiriblər.
Qeyd edilib ki, konsert proqramı sentyabrın 18-də Şuşada da davam etdiriləcək.
