Şərq dünyasının ən böyük mütəfəkkirlərindən və sufi ədəbiyyatının zirvələrindən biri olan Mövlana Cəlaləddin Rumi bəşəriyyətin mənəvi irsində mühüm yer tutur. Onun yaradıcılığı yalnız İslam dünyasında deyil, bütün bəşəriyyətin ruhani düşüncəsində silinməz izlər buraxıb.
“Tehsil365” xəbər verir ki, 1207-ci ildə Xorasanın Bəlx şəhərində dünyaya gələn Mövlana ömrünün böyük bir hissəsini Anadolu torpaqlarında keçirib. Onun ən məşhur əsəri “Məsnəvi” sufi fəlsəfəsinin ən möhtəşəm nümunələrindən sayılır və “sufizmin Quranı” kimi tanınır. Ruminin əsərlərində insan sevgisi, mənəvi saflaşma, Allah eşqi və tolerantlıq ön plana çəkilir.
Mövlana yalnız şair və filosof deyil, həm də insanlıq dəyərlərinin carçısı idi. Onun “Gəl, kim olursan ol, yenə gəl” çağırışı əsrlər boyu bütün dünyada sülhün, dostluğun və mənəvi birliyin simvoluna çevrilib.
Bu gün də Ruminin fikirləri aktuallığını qoruyur, onun poeziyası və hikmət dolu kəlamları Şərq və Qərb mədəniyyətləri arasında körpü rolunu oynayır. UNESCO tərəfindən dəfələrlə yad edilən Mövlana Cəlaləddin Rumi bəşəriyyətin ortaq dəyərlərinin təbliğatçısı kimi tarixdə öz möhtəşəm yerini tutub.