Gecə səmasının ən parlaq ulduzu olan Sirius A minilliklər boyu insanları valeh etmişdir. Qədim misirlilər bu ulduzu xüsusi əhəmiyyətlə qeyd edir, onun doğuşunu Nil çayının daşqınları ilə əlaqələndirirdilər. Yunanlar isə Sirius A-nı mifoloji obrazlarla bağlamış, onu Orionun köpəyi kimi təsəvvür etmişdilər.
“Tehsil365”in araşdırmasına görə, Sirius A Böyük Köpək bürcündə yerləşir və Yerdən cəmi 8,6 işıq ili uzaqlıqda yerləşdiyi üçün “kosmik qonşularımızdan” hesab olunur. Onun görünən parlaqlığı –1,46 dərəcədir ki, bu göstərici ilə də bütün gecə səmasında ən parlaq ulduz sayılır. Sirius A Günəşdən iki dəfə böyük kütləyə, 1,7 dəfə böyük radiusa malikdir. Onun səth temperaturu 9940 Kelvinə çatır və bu səbəbdən ağ-mavi rəngdə görünür. Spektr tipi A1V olan bu ulduz hidrogeni heliuma çevirən əsas ardıcıllıq mərhələsindədir.
Sirius sistemi tək ulduzdan ibarət deyil. O, əslində ikili ulduz sistemidir. Sirius A-nın yoldaşı Sirius B adlı ağ cırtdan ulduzdur. 19-cu əsrdə kəşf edilən Sirius B astronomiya tarixində mühüm hadisə sayılır. O, Günəş qədər kütləyə malik olsa da, radiusu Yerin böyüklüyündədir. Sıxlığı o qədər çoxdur ki, bir çay qaşığı maddəsinin çəkisi tonlarla ölçülür. Bu fakt ulduzların təkamülü və həyat dövrü haqqında elmdə mühüm sübutlardan biri olmuşdur.
Sirius A həm də mədəniyyətlərdə böyük yer tutmuşdur. Misirlilər üçün təqvimlə bağlı əlamət, yunanlar üçün mifoloji rəmz, türk xalqları üçün isə “Qurtuluş ulduzu” kimi qəbul edilmişdir. Minillərdir insanlığın diqqət mərkəzində olan Sirius A bu gün də elm üçün mühüm araşdırma obyekti olaraq qalır. Onun parlaqlığı yalnız gözlərimizi deyil, həm də kosmosun sirlərini öyrənmək istəyimizi işıqlandırır.