“Elementar baza səviyyəsində tapşırıqların minimal həllini verə bilməyən müəllimlərin diplomları necə olur? Məncə, buna cavab vermək lazım deyil, çünki nazirin özü bu suala cavab verir”.
“Tehsil365” AzEdu-ya istinadən xəbər verir ki, bu sözləri təhsil eksperti Elmin Nuri bildirib.
Ekspert qeyd edib ki, Elm və Təhsil naziri Emin Əmrullayev həm media nümayəndələri üçün keçirilən brifinqdə, həm də illik hesabatda səsləndirdiyi fikirlərin bir çoxunda haqlıdır:
“Nazirin bəzi fikirləri hər zaman açıq danışmasına baxmayaraq, bu dəfə daha çılpaqlıqla ifadə olundu. Reallıqlar daha aydın şəkildə ortaya qoyuldu.
Biz hamımız universitetdə oxumuşuq, hər semestr 5-6 imtahan vermişik, dövlət imtahanından keçmişik. Bundan əlavə, özümüzü təkmilləşdirmək üçün kurslara da qatılmışıq və orada da imtahanlardan sonra diplom almışıq. Bir çox müəllimlər də bu yolu keçib. Bəs necə olur ki, indi bəzi məzunlar elementar tapşırıqları həll edə bilmir? Bu, ciddi sualdır.
Bəzilərinin diplomlarına ümumiyyətlə mübahisə edilmir, bəzilərinin isə müəyyən məqsədlərlə verildiyi məlumdur. Amma mən hər şeyi mənfi qiymətləndirmək istəmirəm. Statistikaya baxanda görürük ki, MİQ və sertifikasiya imtahanlarında zəif nəticə göstərənlərin çoxu orta ixtisas təhsil müəssisələrinin məzunlarıdır".