2025-ci tədris ili üzrə ali məktəblərə qəbul imtahanlarının nəticələri açıqlanıb. Yüksək balla qəbul olan abituriyentlərin sayı əvvəlki illərlə müqayisədə artıb.
“Tehsil365” xəbər verir ki, Azərbaycan Dövlət İqtisad Universitetinə (UNEC) 600–700 bal aralığında 308 nəfər qəbul olunub. ADA Universitetinə 3 nəfər 600-dən yuxarı balla qəbul imkanı qazanıb. ADA Universiteti üzrə ümumi qəbul olunanların 77 faizinin nəticəsi 600-dən yüksək olub. Bakı Mühəndislik Universitetində isə yüksək bal toplayanların sayı ötən illə müqayisədə iki dəfə artıb.
Lənkəran Dövlət Universitetinə (LDU) 500-dən yuxarı nəticə göstərən 40 nəfər qəbul olub. Azərbaycan Dövlət Neft və Sənaye Universitetinə (ADNSU) qəbul olunanlardan 721 nəfər 500–600 bal, 117 nəfər isə 600–700 bal toplayıb.
Bakı Dövlət Universitetinə (BDU) 496 nəfər 600-dən yuxarı, ümumilikdə isə 1426 nəfər 500-dən yuxarı nəticə ilə qəbul olub. Azərbaycan Dillər Universitetinə (ADU) 63 nəfər 600-dən, 555 nəfər isə 500-dən yüksək balla qəbul olunub. Azərbaycan Turizm və Menecment Universitetində (ATMU) isə 500-dən yuxarı nəticə göstərən abituriyent olmayıb.
Xəzər Universitetinə qəbul olunanlardan 309 nəfər 500-dən yuxarı, 32 nəfər isə 600-dən yüksək nəticə göstərib. Azərbaycan Texniki Universitetinə (AzTU) qəbul olanların 140 nəfəri 500-dən, 14 nəfəri isə 600-dən yüksək bal toplayıb.