Tələbələrin son dövrlərdə aktual mövzularından biri də danışılan mövzuların telefonda tez-tez qarşılarına çıxmasıdır.
Söhbət etdiyimiz mövzular niyə birdən-birə telefonda qarşımıza çıxır? Telefon və tətbiqlər istifadəçini gizli şəkildə dinləyə bilərmi? Bu prosesin istifadəçilər üçün riski nələrdir?
Mövzu ilə bağlı İKT mütəxəssisi Elvin Abbasov ‘’Tehsil365’’ə verdiyi müsahibəsində bildirib ki, insanların gündəlik söhbət mövzularının qısa müddət sonra telefonda reklam və ya məzmun kimi qarşılarına çıxması çox vaxt təsadüfi deyil.
‘’Smartfon tətbiqləri istifadəçilərin axtarış tarixi, sosial media davranışları, geolokasiya və digər rəqəmsal izlərini toplayaraq, güclü alqoritmlərlə təhlil edir. Bu səbəbdən istifadəçi heç bir axtarış etməsə belə, onun maraq dairəsinə uyğun məzmun qarşısına çıxır’’.
Elvin Abbasov qeyd edib ki, rəsmi olaraq böyük texnoloji şirkətlər mikrofonla gizli dinləməni inkar etsələr də, tətbiqlərə verilən icazələr bu riski texniki olaraq mümkün edir.
‘’İstifadəçilər üçün əsas təhlükələr şəxsi həyatın məxfiliyinin pozulması, rəqəmsal profilləşmə və fişinq hücumlarına şəraitin yaranmasıdır. Buna görə də tətbiq icazələrini minimumda saxlamaq və məxfilik parametrlərini daim yoxlamaq vacibdir’’.