Beynəlxalq Münasibətlər ixtisası gənclər arasında maraq doğuran sahələrdən biridir, lakin bu ixtisası bitirənlərin iş həyatında üzləşdikləri çətinliklər və qazandıqları təcrübələr çox vaxt kifayət qədər işıqlandırılmır.
“Tehsil365” olaraq, bu dəfə Akif Kazımlı ilə söhbət etdik.
A. Kazımlı bildirir ki, beynəlxalq münasibətlər ixtisasını seçməsinin səbəbi siyasətçi olmaq istəyi ilə bağlı olub, lakin həm də öz əməyilə yaşamaq istədiyi üçün bu sahəni seçib. O, Bakı Dövlət Universitetində təhsil aldığını və hazırda əsas fəaliyyət sahəsinin korporativ hüquq olduğunu qeyd edir:
– Beynəlxalq münasibətlər ixtisasını seçməyinizin səbəbi nə idi?
“Mən siyasətçi olmaq istəyirdim, lakin həm də öz əməyimlə yaşamaq. Buna görə beynəlxalq hüquq ixtisasını, lakin Beynəlxalq Münasibətlər fakültəsində seçdim.”
– Hansı universitetdə təhsil almısınız?
“Bakı Dövlət Universiteti.”
– Hazırda hansı işlə məşğulsunuz?
“Hazırda əsas işim korporativ hüquq sahəsindədir.”
– Bu mövqeyə gələnə qədər hansı yolları keçmisiniz?
“Əslində çox çətin oldu mənə, çünki imkanlar və hədəflər arasında balans yox idi. Təhsili fərqlənmə ilə başa vursam da, əmək bazarının tələbləri tamam ayrı idi. Dar sahədə imkanlar var idi, lakin arzuladığım yoldan sapmadım. Hələ də istədiyim yerdə deyiləm, lakin doğru yolda olduğumu düşünürəm.”
– Bəli, təəssüf ki, hazırda bu ixtisası oxuyan gənclər də eyni problemlə üz üzədir. Həmin gənclərə hansı tövsiyələri verərdiniz?
" Bu yol alpinizm qədər çətindir, zirvəyə tək-tük adam yüksələ bilər. Bu ixtisası seçən gənclər bunu nəzərdə tutmalıdırlar. Əla ingilis dili (C1 və ya C2) mütləqdir, əlavə bir-iki dil isə B2 səviyyəsində olmalıdır. Tələbəlik zamanından başlayaraq praktiki təcrübə toplamaq, səbrli olmaq, çoxlu və seçici mütaliə etmək lazımdır. Yaxşı intellektual çevrə və həmkarlar toplamaq vacibdir. İmkanı olanlar səyahət etsin, edə bilməyənlər isə turizm sahəsində xaricilərlə birbaşa kontaktdan və layihələrdən istifadə edə bilər.”
– Universitet dövrünə qayıtsanız, nəyi fərqli edərdiniz?
“Bu ən gözəl fakültələrdən biridir, humanitar sahədə çoxlu intellektual insanlar çalışır, dünyanın hər yerindən savadlı kadrlar var. Mən bu yolu 20 ilə keçdim, imkanı olan 5–10 ildə tamamlasın.
Həm sizə, həm də müsahibəni oxuyan gənclərə karyera yolunda iradə, qətiyyət və uğurlar arzu edirəm.”