“Sentyabrın 15-dən yeni tədris ilinin başlanması ilə bir çox məktəblərdə valideyn komitələri tərəfindən “fond pulu”, “zibil pulu” və digər adlar altında vəsaitlərin toplanması halları müşahidə olunur. Belə ödənişlərin məbləği əvvəlcədən müəyyən edilərək valideynlərdən hər ay 15–20 manat məcburi şəkildə tələb edilir.”
Bu barədə təhsil eksperti Əli Ələkbərov “Tehsil365”ə bildirib:
“Qanunvericilik açıq şəkildə göstərir ki, dövlət ümumtəhsil müəssisələrində təhsil ödənişsizdir. Buna görə də valideynlərdən belə məcburi ödənişlərin yığılması qətiyyən yolverilməzdir. Valideyn komitələrinin vəzifəsi pul toplamaq deyil, məktəb və valideynlər arasında əməkdaşlığı gücləndirməkdir.”
Ekspert əlavə edib ki:
“Bu problemin qarşısını almaq üçün ilk növbədə valideynlər maarifləndirilməlidir. Onlar bilməlidirlər ki, heç kəs onlardan pul tələb edə bilməz və belə hallarla qarşılaşdıqda mütləq Elm və Təhsil Nazirliyinə və digər müvafiq qurumlara məlumat verməlidirlər.”
Ə. Ələkbərov həmçinin vurğulayıb ki:
“Valideyn komitələrinin fəaliyyətinə nəzarət artırılmalı, onların qanunsuz maliyyə toplamasına son qoyulmalıdır. Məktəblərin təsərrüfat və digər xərcləri isə dövlət büdcəsindən qarşılanmalı, valideynlərin üzərinə yüklənməməlidir.”
Sonda təhsil eksperti əlavə edib ki:
“Hər hansı əlavə ehtiyac yalnız könüllülük və şəffaflıq əsasında, bütün valideynlərin razılığı ilə təmin edilməlidir. Məcburi pul yığımı həm valideynləri narahat edir, həm də təhsil mühitində neqativ halların artmasına səbəb olur.”
“Uşaqlarımızın təhsili heç bir ‘fond pulu’na bağlı olmamalıdır. Təhsil ödənişsizdir və belə də qalmalıdır,” – deyə Əli Ələkbərov bildirib.