Məktəblərdə şagirdlər arasında bullinq halları cəmiyyətin diqqət mərkəzində qalmaqda davam edir. Aqressiv davranışların yaratdığı fəsadlar həm uşaqların psixoloji durumuna, həm də təhsil prosesinə ciddi təsir göstərir.
Məsələ ilə bağlı “Tehsil365”ə Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin böyük məsləhətçisi Təranə Piriyeva məlumat verib.
Komitədən bildirilib ki:
“Uşaqların sağlam və təhlükəsiz mühitdə böyüməsinin təmin edilməsi Ailə, Qadın və Uşaq Problemləri üzrə Dövlət Komitəsinin əsas prioritetlərindən biridir. Bu istiqamətdə real vəziyyətin təhlil edilməsi məqsədilə ‘Yetkinlik yaşına çatmayanlar arasında aqressiv davranış: bullinq’ adlı araşdırma işi həyata keçirilmiş, aqressiv davranışların (bullinqin) yayılma səviyyəsi, yaranma səbəb və nəticələri, bullinqlə mübarizə yolları təhlil edilmişdir. Yetkinlik yaşına çatmayanlar arasında aqressiv davranış halları ilə bağlı 30 nəfər mütəxəssislə dərinləşdirilmiş müsahibə aparılmış və məzmun təhlili həyata keçirilmişdir. Əldə edilmiş nəticələr əsasında ailələrə, valideynlərə, ümumi təhsil müəssisələrinə, cəmiyyətə, dövlətə və şəxsin özünə yönəlik təkliflər hazırlanmışdır.”
Komitə həmçinin qeyd edib:
“Ailə, Qadın və Uşaq Problemləri üzrə Dövlət Komitəsi yanında 2020-ci ildən fəaliyyət göstərən Uşaq Səfirlər Məclisinin ‘Uşaqdan-uşağa’ layihəsi çərçivəsində yetkinlik yaşına çatmayanlar arasında aqressiv davranışla mübarizə məqsədilə Bakı şəhərinin müxtəlif ümumi təhsil müəssisələrində, o cümlədən Uşaq Səfirlər Məclisinin regional nümayəndəlikləri vasitəsilə müxtəlif bölgələrdə mütəmadi olaraq bu istiqamətdə müxtəlif maarifləndirici tədbirlər, dəyirmi masalar və görüşlər keçirilir.”
Məlumatda vurğulanıb ki, görülən tədbirlərin davamlılığı üçün müxtəlif qurumlarla əməkdaşlıq gücləndirilir:
“Uşaqlar arasında aqressiv davranış halları ilə mübarizə istiqamətində aidiyyəti qurumlarla kordinasiyalı fəaliyyətin daha da gücləndirilməsi və problemin həlli istiqamətində yeni nəticələrin əldə edilməsi məqsədilə 2 dekabr 2024-cü il tarixində Dövlət Komitəsi tərəfindən ‘Yetkinlik yaşına çatmayanlar arasında aqressiv davranış halları ilə mübarizə’ adlı konfrans təşkil edilmişdir. Konfransda Bakı şəhərinin bütün rayonlarından yerli icra hakimiyyəti orqanlarının Uşaq hüquqlarının müdafiəsi üzrə məsul katiblərin, uşaq və ailələrlə iş üzrə məsləhətçi-psixoloqların, polis idarələrinin yetkinlik yaşına çatmayanlarla profilaktik işin təşkili üzrə inspektorların, məktəb direktorlarının və psixoloqların, qeyri-hökumət təşkilatlarının nümayəndələri iştirak etmişdir.”
Komitədən əlavə olunub ki, təlimlərin keçirilməsi də davam etdirilir:
“‘Yetkinlik yaşına çatmayanlar arasında aqressiv davranış (bullinq)’ mövzusunda Dövlət Komitəsi tərəfindən 17-18 mart 2025-ci il tarixlərində Təlimçilər üçün təlim (TOT) formatında təlim həyata keçirilmişdir. Ekspert qismində dəvət edilmiş Türkiyənin Sakarya Universitetinin İnsan və Toplum Bilimləri Fakültəsinin Sosial Xidmət Bölməsinin müəllimi prof. dr. Mehmet Zafer Danış tərəfindən iştirakçılara yetkinlik yaşına çatmayanlar arasında aqressiv davranış, uşaqların bullinqə məruz qalması, bullinqin növləri, habelə onunla mübarizə sahəsində həyata keçirilən profilaktik işin təşkili və s. istiqamətlərdə məlumatlar verilmişdir. Təlimlərə Bakı və Abşeron-Xızı Regional Təhsil İdarəsinin tabeliyində fəaliyyət göstərən ümumtəhsil müəssisələrinin psixoloqları cəlb edilmişdir.”
Yekun olaraq Təranə Piriyeva bildirib ki:
“Bullinq təkcə uşaqları deyil, cəmiyyətin bütün təbəqələrini əhatə edə bilər və bu ciddi problemlə mübarizə təkcə dövlət qurumlarının deyil, həm də qeyri-hökumət təşkilatlarının, təhsilverənlərin, müəllimlərin, ailələrin və bütün cəmiyyətin ümumi vəzifəsidir.”