Universitetlərin bufetlərində təqdim olunan menyular çox zaman tələbələrin sağlamlıq ehtiyaclarını qarşılamır. Tez hazırlanmış qidalar, şirniyyat məhsulları və qazlı içkilərin üstünlük təşkil etməsi balanslı qidalanma imkanlarını məhdudlaşdırır. Bu isə xüsusilə sıx dərs cədvəlinə malik tələbələrin gündəlik enerji səviyyəsinə və ümumi sağlamlığına təsir göstərir.
"Tehsil365" xəbər verir ki, aparılan müşahidələrə görə, bir çox universitet bufetlərində sağlamlıq üçün vacib olan tərəvəz, protein və liflə zəngin yeməklərin azlığı müşahidə olunur. Ekspertlərin fikrincə, düzgün qidalanmayan tələbələrdə dərsə diqqətin azalması, yorğunluq və tez-tez xəstələnmə halları artır. Müasir təhsil müəssisələrinin bu sahədə məsuliyyət daşıdığı və daha keyfiyyətli, sağlam seçimlər təqdim etməsi vacib hesab olunur.
Mütəxəssislər bildirirlər ki, tələbələrin həm fiziki, həm də akademik uğurlarını dəstəkləmək üçün bufetlərdə menyular yenilənməli, sağlam qidaların əlçatanlığı artırılmalıdır. Bu, həm qida mədəniyyətinin formalaşmasına, həm də gənclərin gələcəkdə sağlam həyat tərzi seçiminə müsbət təsir göstərə bilər.