Anım Gününün beşinci ildönümü münasibətilə Zəngilan Şəhidlər xiyabanında ağacəkmə aksiyası təşkil olunub. Tədbir Cəbrayıl, Qubadlı və Zəngilan rayonlarında Prezidentin xüsusi nümayəndəliyi, Qarabağ Dirçəliş Fondu və “Huner Group” şirkətinin dəstəyi ilə keçirilib.
“Tehsil365” AZƏRTAC-a istinadən xəbər verir ki, iştirakçılar əvvəlcə şəhidlərin məzarlarını ziyarət edib, onların xatirəsini bir dəqiqəlik sükutla yad ediblər. Sonra çıxışlarda Anım Gününün həm kədər, həm də milli qürur və birliyin təntənəsi olduğu vurğulanıb.
Aksiya çərçivəsində damcı suvarma sistemi quraşdırılan ərazidə ümumilikdə 390 ağac əkilib. QDF-in məlumatına görə, işğaldan azad edilmiş ərazilərdə ekoloji tarazlığın bərpası Fondun prioritet istiqamətlərindən biridir.
Qeyd edilib ki, erməni işğalı zamanı dağıdılmış Zəngilan Şəhidlər xiyabanı azadlıqdan sonra tam bərpa olunub.