Son illərdə aparılan araşdırmalar göstərir ki, otaqda yaşıl bitkilərin saxlanılması həm fiziki, həm də psixoloji sağlamlığa müsbət təsir göstərir. Bitkilər havanı təmizləməklə yanaşı, insan beynində rahatlıq və sakitlik yaradır. Xüsusilə qapalı məkanlarda çox vaxt keçirən tələbələr və ofis işçiləri üçün bu vərdiş daha faydalı hesab olunur.
“Tehsil365” xəbər verir ki, mütəxəssislərin fikrincə, otaq bitkiləri karbon qazını azaldaraq oksigeni artırır, bu da nəfəs yollarının fəaliyyətini gücləndirir. Digər tərəfdən, yaşıllığın yaratdığı vizual rahatlıq insanın stress səviyyəsini aşağı salır, diqqət və yaddaş kimi idrak funksiyalarını yaxşılaşdırır. Məhz buna görə də məktəb və universitet auditoriyalarında da bitkilərin artırılması tövsiyə edilir.
Mütəxəssislər həmçinin qeyd edirlər ki, otaqda bitki saxlayan insanların yuxu keyfiyyəti daha yaxşı olur. Havanın təmiz qalması allergik reaksiyaların qarşısını alır, ürək-damar və sinir sistemi üçün faydalı mühit yaradır. Buna görə də həkimlər ev və iş otaqlarında ən azı bir neçə yaşıl bitki saxlamağı sağlam həyat tərzinin bir hissəsi kimi dəyərləndirirlər.