3 oktyabr 2025-ci il tarixində Azərbaycan Dövlət Neft və Sənaye Universitetinin (ADNSU) nəzdində Bakı Neft-Energetika Kollecində 5 oktyabr – Ümumdünya Müəllimlər Günü münasibətilə tədbir keçirilib.
“Tehsil365” xəbər verir ki, tədbir Azərbaycan Respublikasının Dövlət himninin səsləndirilməsi və Vətən uğrunda canından keçən Şəhidlərin əziz xatirəsinin bir dəqiqəlik sükutla yad edilməsi ilə başlayıb. Daha sonra Ulu Öndər Heydər Əliyevin müəllimlik peşəsinin əvəzsiz rolu barədə söylədiyi fikirləri əks etdirən videoçarx nümayiş olunub.
Kollecin direktoru, dosent Ata Babayev çıxış edərək, müəllimləri peşə bayramı münasibətilə təbrik edib, onların gənc nəslin formalaşmasında oynadığı mühüm roldan bəhs edib. O, təhsil sahəsində görülən işlərdən və müəllim əməyinə verilən yüksək qiymətdən danışıb.
Tədbirin sonunda pedaqoji fəaliyyətində fərqlənən müəllimlərə Təşəkkürnamələr təqdim olunub.
