Son illərdə gənclər arasında yuxu rejiminin pozulması halları artmaqdadır. Gec saatlara qədər telefon, kompüter və digər ekran qarşısında vaxt keçirmək beyinin istirahət prosesini ləngidir. Nəticədə, gün ərzində öyrənilən məlumatlar yaddaşda tam formalaşmır və informasiya saxlama qabiliyyəti zəifləyir. Mütəxəssislər qeyd edirlər ki, bu vəziyyət uzunmüddətli perspektivdə diqqət çatışmazlığına və öyrənmə çətinliklərinə səbəb ola bilər.
“Tehsil365” xəbər verir ki, elmi araşdırmalar göstərir: yuxusuz gecələrdən sonra beyində məlumatların emalı prosesi ləngiyir və yeni bilgilərin qavranılması çətinləşir. Xüsusilə tələbələr və məktəblilər arasında bu problem daha çox müşahidə olunur. Beyin gecə saatlarında yaddaş hüceyrələrini yenilədiyi üçün yuxu çatışmazlığı öyrənmə performansına birbaşa təsir göstərir.
Mütəxəssislər gənclərə hər gecə ən azı 7-8 saat yuxu yatmağı, yatmazdan əvvəl elektron cihazlardan uzaq qalmağı və sakit mühitdə istirahət etməyi tövsiyə edirlər. Yuxu balansının qorunması həm akademik uğur, həm də psixoloji sabitlik üçün əsas faktorlardan biri hesab olunur.