İqtisadi Əməkdaşlıq və İnkişaf Təşkilatı (OECD) oktyabrın 7-də müəllimlər və məktəb rəhbərlərinin iştirakı ilə keçirilmiş beynəlxalq sorğunun – TALIS 2024 araşdırmasının nəticələrini ictimaiyyətə təqdim edəcək.
“Tehsil365” xəbər verir ki, bu barədə təşkilatın rəsmi saytında məlumat yerləşdirilib.
TALIS (Teaching and Learning International Survey) sorğusu 50-dən çox ölkədə məktəb müəllimləri və rəhbərlərinin peşəkar fəaliyyəti, iş şəraiti, təlim resurslarına çıxışı və idarəetmə mexanizmləri haqqında məlumatların toplanmasını hədəfləyir. Araşdırma müəllimlərin öz rolları, peşəkar inkişaf ehtiyacları və məktəblərdə təhsilin keyfiyyəti barədə fikirlərini əks etdirir.
OECD bildirib ki, bu araşdırma təhsil siyasətçilərinə və qərarvericilərə qlobal miqyasda müəllim dəstəyi və məktəb idarəçiliyi sahəsində daha effektiv yanaşmalar hazırlamaq üçün əsaslı məlumatlar təqdim edəcək.
Sorğunun nəticələrinin təqdimatı təşkilatın Parisdəki qərargahında baş tutacaq və ictimaiyyətə açıq olacaq.