Almaniyanın “Constructor Universit”y və Azərbaycanın “CELT Colleges” təhsil müəssisələri arasında əməkdaşlığa dair Anlaşma Memorandumu imzalanıb. Sənədin imzalanma mərasimi paytaxt Bakıda keçirilib.
“Tehsil365” xəbər verir ki, memorandumun məqsədi “Constructor University” proqramlarına qəbul olunmuş tələbələrin təhsilinin və fərdi inkişafının dəstəklənməsi, eləcə də onların beynəlxalq standartlara uyğun təhsil imkanlarına çıxışının genişləndirilməsidir.
Razılaşmaya əsasən, “CELT Colleges” bundan sonra “Constructor University”nin Azərbaycandakı rəsmi filialı kimi fəaliyyət göstərəcək. Universitetin bakalavr dərəcəsi proqramlarının ilk iki ili Bakıda – “CELT Colleges”də, sonuncu ili isə Almaniyanın Bremen şəhərində yerləşən “Constructor University” kampusunda tədris olunacaq. Bu model tələbələrə təhsilin ilkin mərhələsini yerli mühitdə beynəlxalq standartlara uyğun şəkildə keçmək, sonrakı mərhələdə isə Almaniyada ali təhsilini davam etdirərək beynəlxalq diplom əldə etmək imkanı yaradacaq.
Əməkdaşlıq çərçivəsində tələbələr fənn yönümlü xüsusi dərslərdən və akademik bacarıqların inkişafına yönəlmiş proqramlardan faydalanacaqlar. Tərəflər bu təşəbbüsün Azərbaycan və Almaniya arasında akademik və mədəni əlaqələrin möhkəmlənməsinə xidmət edəcəyini qeyd ediblər.
Tədbirdə media nümayəndələri, hər iki təhsil qurumunun rəhbərliyi və əməkdaşları, eləcə də Alman-Azərbaycan Cəmiyyətinin sədri, professor Çingiz Abdullayev iştirak ediblər. Ç.Abdullayev çıxışında bu təşəbbüsü iki ölkə arasında təhsil, mədəni və iqtisadi münasibətlərin inkişafına dəyərli töhfə kimi səciyyələndirib.
“Constructor University”nin Beynəlxalq əlaqələr üzrə vitse-prezidenti və icraçı direktoru professor Tomas Auf der Heyde Azərbaycanın beynəlxalq təhsil məkanında artan rolunu vurğulayaraq deyib:
“Constructor University Azərbaycan və onun təhsil institutları ilə əlaqələrin möhkəmləndirilməsində böyük potensial görür. Hazırda azərbaycanlı tələbələr Bremen kampusundakı 2000 tələbə arasında sayca dördüncü ən böyük beynəlxalq qrupu təşkil edirlər. Bu baza üzərində biz artıq Azərbaycanda uzunmüddətli və birbaşa iştirakımızı gücləndirmək niyyətindəyik. “CELT Colleges” ilə yeni tərəfdaşlığımız bu istiqamətdə mühüm mərhələdir”.
“CELT Colleges”in baş direktoru Xəyyam Dəmirov isə bildirib ki, dünya səviyyəli təhsil müəssisəsi ilə əməkdaşlıq tələbələrə qlobal imkanlar qazandıracaq. “Bu tərəfdaşlıq sayəsində tələbələrimiz təhsilə Bakıda başlayaraq, Almaniyada əsas kampusda davam etdirəcək və beynəlxalq səviyyədə tanınan diplom əldə edəcəklər. Biz yerli mükəmməlliyi qlobal üfüqlərlə birləşdirən yeni bir yol inşa edirik”, – deyə o vurğulayıb.