Müasir Azərbaycan ədəbiyyatının tanınmış nümayəndələrindən biri olan İlqar Fəhmi bu dəfə də oxucularına dərin mənəvi çalarlarla dolu bir şeir təqdim edib. “Mən səni harda unutdum?” adlı bu əsər sevginin itməsi, yaddaşın zəifləməsi və keçmişin insan ruhunda buraxdığı izləri poetik dillə əks etdirir.
“Tehsil365” xəbər verir ki, şair - adi bir sualdan - “harda unutdum?” - yola çıxaraq insanın keçmişə, xatirələrə və itirilmiş duyğulara səyahətini təsvir edir. Oxucu sanki şairlə birlikdə o itirilmiş sevgini axtarır, lakin nəticədə anlayır ki, sevgi ilə birlikdə insan özünün bir parçasını da geridə qoyur.
İlqar Fəhminin bu şeiri həm nostalji, həm də varoluşun poetik düşüncəsi kimi qiymətləndirilir. Əsər, son dövrlərdə onun yaradıcılığında müşahidə olunan dərin fəlsəfi lirizmin daha bir nümunəsidir.
Səhərdən axtarıb gəzirəm, amma,
Heç yerdən ətrini ala bilmirəm.
Mən sənin sevgini hara qoymuşam,
Heç cürə yadıma sala bilmirəm.
Fikrim dağılıbdı axır zamanlar,
Sanki gözə gəlib yaddaşım, huşum.
Yəqin, keçən həftə bilər yerini,
Ya da keçən aydan səni soruşum.
Bəlkə, yollar oldu məni çaşdıran?
Qatar oğurladı itən sevgimi,
Tələsik düşəndə kupedə qoydum,
Oxunub qutarmış bir kitab kimi?
Mən səni, görəsən, harda unutdum?
Yağışda itirdim, qarda unutdum?
Nəsə, həyatı da...Mən bu yaşıma,
Kimlərdən, nələrdən doyub gəlmişəm.
Təkcə səni deyil, mən özümü də,
Sənli günlərimdə qoyub gəlmişəm...