Azərbaycan poeziyasının görkəmli nümayəndəsi Musa Yaqubun “Öyrətmə özünə” adlı şeiri oxuculara sevgi ilə əzabın vəhdətini duyurur. Şair bu əsərində insanın duyğusal zəfər və məğlubiyyət anlarını poetik dillə təsvir edir.
“Tehsil365” xəbər verir ki, əsərdə ayrılığın qaçılmaz ağrısı, sevginin taleyə çevrilməsi və insanın öz hisslərindən qorxusu ön plana çəkilir. Təkrarlanan “öyrətmə belə” misrası, müəllifin sevginin gətirəcəyi acılardan qorunmaq istəyini əks etdirir.
Musa Yaqubun poetik irsi bu kimi dərin lirizmi və həyat fəlsəfəsini əhatə edən nümunələrlə doludur. “Öyrətmə özünə” şeiri də bu baxımdan onun yaradıcılığında insan ruhunun ziddiyyətlərini, sevgi və iztirabın birləşdiyi nöqtəni nümayiş etdirən dəyərli nümunələrdən biridir.
“Öyrətmə özünə, öyrətmə məni,
Yox buna təqatim, yox buna tabım
Əlimi əlindən üzmək əzabım,
Sonra bu əzaba dözmək əzabım…
Yoxsa da, könlümün sınıqları var,
Hicranın köz basmış yanıqları var
Mənim dərdlərimin ayaqları var
Harda olsa gəlib tapacaq məni,
Yaxıb yandıracaq bu ocaq məni.
Gəl məni özünə öyrətmə belə,
Əlimi əlinə öyrətmə belə,
Gözümü gözünə öyrətmə belə…”