Azərbaycan poeziyasının çağdaş nümayəndələrindən olan Mətləb Tənha, duyğuların səmimiyyəti və fikirlərin aydınlığı ilə seçilən şairlərdəndir.
“Tehsil365” xəbər verir ki, onun “Deyirsən şeir yaz, nə yazım sənə?” adlı şeiri qadın varlığının böyüklüyünə, mənəvi dəyərlərinə və bəşəri əhəmiyyətinə ithaf olunmuş bir tərifnamədir.
“Deyirsən şeir yaz, nə yazım sənə?
Təpədən dırnağa şeirsən, qadın!
Nəyini vəsf edim, nədən söz açım?
Sən özün hər şeyə dəyirsən, qadın...
Səndə gözəlliyi görənə, əhsən!
Qədrini biləcək ərənə, əhsən!
Səni bu dünyaya verənə, əhsən!
Bütöv bir dünyaya, dəyirsən, qadın..
Anasan, bacısan, övladsan, yarsan...
Torpaqsan, ocaqsan, qeyrətsən, arsan...
Nə gözəl varlıqsan, nə gözəl varsan...
Haqqın var özünü öyəsən, qadın!”
Şair qadını yalnız gözəllik rəmzi kimi deyil, yaradılışın mərkəzi, həyatın mənbəyi kimi təqdim edir. O, qadının həm ana, həm bacı, həm yar, həm də Vətən obrazında təcəssüm etdiyini vurğulayır. Şeirdəki “Təpədən dırnağa şeirsən, qadın!” misrası, qadının özü ilə poeziya arasında qurulan bənzətmənin poetik gücünü göstərir.
Mətləb Tənha qadına yalnız estetik baxımdan yox, həm də mənəvi və insani dəyərlər prizmasından yanaşır. Şair qadının həyatdakı yerini sadəcə tərifləmir, onu haqq etdiyi ucalıqda təqdim edir — “Haqqın var özünü öyəsən, qadın!” deyərək qadının həm müqəddəs, həm də qürurlu bir varlıq olduğunu bəyan edir.
Bu şeir təkcə bir tərif deyil, həm də hörmət, sevgi və minnətdarlığın poetik ifadəsidir.