‘‘Füyuzat’’ tarixdən bu günə Azərbaycan ədəbiyyatına çox böyük təsir etmişdir. Tarixi ‘‘Füyuzat’’ın ədəbiyyatımızın inkişafındakı rolu danınmazdır.
Bəs müasir Füyuzat yazıçıları həm tarixi “Füyuzat”ın, həm də bugünkü “Füyuzat” jurnalının müasir Azərbaycan ədəbiyyatına və yazıçı nəslinin formalaşmasına təsirini necə qiymətləndirir?
Bu barədə “Füyuzat” jurnalının məsul redaktoru Samir Ramizoğlu ‘‘Tehsil365’’ə müsahibəsində deyir:
‘‘1906–1907-ci illərə nəzər saldıqda görürük ki, “Füyuzat”ın nəşri dövrün tələb və ehtiyacı idi. Əli bəy Hüseynzadə bir təbib kimi cəmiyyətin xəstəliyini öyrənir və bir rəssam kimi onun rəsmini çəkə bilirdi. O, arzu olunan səadətə çatmaq üçün yolu maarif, ittihad və hürriyyətdə görürdü. Eləcə də ədib bunları bir nemət adlandırır, “Əsl nicat bu üç qüvvədədir!” söyləyərək hər bir türk fərdinin rahatlıqla müraciət edə biləcəyi dərginin yaranmasını zərurət hesab edirdi. Beləliklə, “Həyat” qəzeti qapandıqdan sonra 1906-cı ildə lüğəvi mənası bolluq, bərəkət, rifah və feyz anlamlarını daşıyan “Füyuzat” dərgisi təsis edildi. 32 sayı işıq üzü görən dərgi, çox təəssüflər olsun ki, cəmi 1 il fəaliyyət göstərə bildi.
Az müddət yaşamasına baxmayaraq, “Füyuzat” bir ədəbi məktəbə çevrildi. Hətta qapandıqdan sonra belə, dərgiçilikdə yeni ənənələrin bünövrəsini qoydu. Əski “Füyuzat” dərgisi yazarlarının bəziləri ədəbiyyatın görkəmli simalarına, bəziləri də Cümhuriyyətin qurucularına çevrildi. Həm tarixi, həm də müasir “Füyuzat” dərgisi ətrafında bir çox seçkin yazıçı imzaları cəmlənmişdir. Onlardan bəziləri hələ tələbəlik illərindən dərgi ilə əməkdaşlıq etməyə başlamış, bu isə gənclərin yaradıcılığına istiqamət vermiş, gələcək fəaliyyətlərinə stimul olmuşdur. Müasir “Füyuzat”ın 18 il ərzində əməkdaşlıq etdiyi yazarlar içərisində uğurlu qələm sahibləri də var. Onlar müasir ədəbi və akademik mühitin formalaşmasında əhəmiyyətli rol oynayır. Bu müəlliflərin bəzilərinin ilk kitabı məhz “Füyuzat kitab” xətti ilə çap olunmaqdadır’’.