Azərbaycan ədəbiyyatında özünəməxsus poetik üslubu ilə seçilən Pünhan Əzim növbəti dəfə oxucunu dərin mənəvi düşüncələrə səsləyir. Onun “Nə bu dünyada, könül, ad eləməkdir məsələ...” misraları həyatın həqiqi dəyərinin nə ad-san qazanmaqda, nə də zahiri şöhrətdə olmadığını vurğulayır.
“Tehsil365” xəbər verir ki, şairin fikrincə, insanı ucaldan səmimiyyət, mərhəmət və könül zənginliyidir. Pünhan Əzim üçün “məsələ” - bir qəlbi sevindirmək, bir uçuq daxmanı abad etmək, bir ehtiyac sahibinə əl uzatmaqdır. O, oxucuya insan olmağın mahiyyətini sadə, amma dərin mənalı misralarla izah edir.
Şeirdə təvazökarlıq, mənəvi saflıq və paylaşmaq kimi dəyərlər ön plana çıxır. Pünhan Əzim göstərir ki, həyatın mənası böyük işlərdə deyil, kiçik, amma ürəkdən gələn xeyirxah addımlardadır.
Bu şeir bir daha sübut edir ki, sözün gücü insanın iç dünyasına toxunduqda həqiqi təsir yaradır.
“Nə bu dünyada, könül, ad eləməkdir məsələ,
Nə özündən nəsə icad eləməkdir məsələ.
Eşq sirrin daşımaq güc tələb etmir səndən
Sübh susmaq, gecə fəryad eləməkdir məsələ.
Qəlbə Allah özü mətləbləri ilham eləyir,
Nəfsi təlim edib ustad eləməkdir məsələ.
Bir sınıq qəlbi zamanında sevindirməkdi,
Bir uçuq daxmanı abad eləməkdir məsələ.
Sən də bir sailə imkan qədər ikram eylə
Demirəm, hamıya imdad eləməkdir məsələ.
Demərəm dərdimi bir şəxsə Xudadan qeyri -
Məsələ onda deyil, yad eləməkdir məsələ.
Belə Pünhanı səhər küsdürün, axşam barışır,
Azacıq könlün alıb şad eləməkdir məsələ.”