Müasir ədəbi mühitdə gənc şairlərin yaradıcılığına maraq artmaqdadır. Onlardan biri də Elvin İlqaroğludur. Onun son illər sosial şəbəkələrdə geniş şəkildə paylaşılan “Qəlbimi ikiyə bölən adamsan” adlı şeiri səmimi duyğuları, sevgi və xəyanət arasındakı incə xətti təsirli şəkildə ifadə etməsi ilə diqqət çəkib.
“Tehsil365” xəbər verir ki, şeirdə müəllif insanın daxili sarsıntılarını, sevdiyi şəxsin etimadını itirməsinin ağrısını poetik dillə təqdim edir. “Mənim görüşümə ağlayıb gələn, özgələr yanında gülən adamsan” misrası isə oxucular arasında xüsusilə rezonans doğurub.
Elvin İlqaroğlu bu əsərində sevginin təkcə hiss deyil, həm də sınaq olduğunu göstərir. Şairin sözlərinə görə, bəzən insanın qəlbini yaralayan da, sağaldan da eyni adam olur. Şeirin sonunda isə müəllifin “Sən bütün dünyaya olsan da diri, mənim gözlərimdə ölən adamsan” misrası əsərin ən təsirli notu kimi səslənir.
Ədəbiyyatsevərlər bu şeiri müasir gəncliyin hisslərini, sevginin dəyişən üzünü və sadiqliyin dəyərini əks etdirən nümunə kimi qiymətləndirirlər.
“Hər şeyi buraxıb getməyə nə var?
Sən bütün bunları bilən adamsan.
Mənim görüşümə ağlayıb gələn,
Özgələr yanında gülən adamsan.
Sənin həyatında eşqin yeri nə?
Heyif ki, inandım sən tək birinə…
Sən mənim dərdimi bölmək yerinə,
Qəlbimi ikiyə bölən adamsan.
Qəribə dünyadır – qaralı, ağılı…
Mən sənə inandım gözləri bağlı.
Sən bizi buraxıb ürəyi dağlı,
Bütün olanları silən adamsan.
Bilinməz dünyanın hikməti, sirri,
Gedənin sanma ki, görünər yeri.
Sən bütün dünyaya olsan da diri,
Mənim gözlərimdə ölən adamsan!”