Gənclərin həm dini və milli-mənəvi dəyərlərlə, həm də elmi bilik və təhsillə balanslı şəkildə formalaşması bu günün əsas çağırışlarından biridir. Bu istiqamətdə atılacaq addımlar gələcək nəslin sağlam düşüncəli və vətənpərvər yetişməsinə xidmət edir.
Təhsil eksperti Rizvan Fikrətoğlu “Tehsil365”ə açıqlamasında bildirib ki, gənclərin düzgün formalaşması üçün kompleks və mərhələli yanaşma vacibdir. Onun sözlərinə görə, “təhsil sistemində dəyərlərlə elmin inteqrasiyası təmin olunmalı, dini və milli dəyərləri təbliğ edən fənlər – vətəndaşlıq, mənəviyyat, mədəniyyət tarixi, multikulturalizm – praktik və müzakirə yönümlü şəkildə tədris edilməlidir".
Ekspert vurğulayıb ki, elm və texnologiyanın insanlığa xidmət rolu gənclərə düzgün təqdim edilməlidir: “Gənclər dini dəyərləri elmi inkişafa zidd yox, tamamlayıcı kimi görməlidirlər. Məsələn, İbn Sina və Nəsrəddin Tusi kimi islam alimlərinin nümunəsi bu baxımdan çox dəyərlidir".
Rizvan Fikrətoğlunun fikrincə, dini biliklər radikal təsirlərdən uzaq şəkildə tədris olunmalı, gənclər üçün dini maarifləndirici klublar, seminarlar və tədbirlər təşkil edilməlidir.“Bu prosesə həm din xadimləri, həm də alimlər cəlb olunmalıdır. Dini mövzular müzakirə edilərkən elmi və açıq düşüncə tərzi aşılanmalıdır".
Ekspert əlavə edib ki, sosial media bu sahədə mühüm rol oynayır. Onun sözlərinə görə, “dini və milli dəyərlər gənclərə müasir formada — qısa videolar, podkastlar və sosial kampaniyalar vasitəsilə çatdırılmalıdır. Sosial şəbəkələrdə zərərli dini və antinəsilçi trendlərə qarşı maarifləndirici rəqəmsal layihələr həyata keçirilməlidir".
Rizvan Fikrətoğlu sonda qeyd edib ki, gənclər yalnız məlumatla deyil, düşüncə bacarığı ilə də silahlanmalıdırlar.“Tənqidi və analitik düşüncə dərsləri, məntiq və əxlaq fənləri vasitəsilə gənclərdə həm milli-mənəvi, həm də elmi baxış arasında körpü qurmaq mümkündür".
Ekspertin fikrincə, Türkiyə, Malayziya və Qazaxıstan kimi ölkələrin təcrübəsindən faydalanmaq olar, lakin “Azərbaycanın təhsil modeli öz tarixi və milli-mənəvi dəyərləri üzərində qurulmalıdır".